პარლამენტის წინ მიმდინარე აქცია, გუშინ ცოცხალი ჯაჭვით და საქართველოს ჰიმნით დაასრულდა. ხელჩაკიდებულებმა კიდევ ერთხელ გააპროტესტეს 20 ივნისის მოვლენები და ოკუპაცია. მათ პარლამენტი სიმბოლურ ალყაში მოაქციეს.
აქციის ორგანიზატორების განცხადებით, მოთხოვნები უცვლელია – გათავისუფლდნენ აქციის ღამეს დაკავებულები, დაისაჯონ პოლიციელები, რომლებმაც ძალას გადაამეტეს და გადადგეს შინაგან საქმეთა მინისტრი, რომელსაც აქციის მონაწილეთა თქმით, ათობით ადამიანის დაშავებაზე პასუხისმგებლობა ეკისრება. მათივე განცხადებით, იმ შემთხვევაში, თუ ხელისუფლების მიმართ წაყენებული მოთხოვნები არ დაკმაყოფილდება, აქციები უფრო ფართომასშტაბიანი გახდება.
სამოქალაქო აქტივისტები დღეს 19:00 საათზე პარლამენტის წინ ისევ შეიკრიბებიან.
„რეალურად აქციის ორგანიზატორებისა და მონაწილეების გეგმები არის უცვლელი. ჩვენ ყოველ დღე მოვდივართ აქ, სამსახურში 7 საათზე, პარლამენტის წინ. ახალგაზრდებს გვახასიათებს კრეატიული აზრები, ამიტომ შევეცდებით, რომ ხვალ, ზეგ, მაზეგ და თუ დაგვჭირდა ორი კვირის შემდეგ, მაქსიმალურად ბევრი კრეატივი დავდოთ, მაქსიმალურად ბევრი ხმაურით შევაწუხოთ ჩვენი ხელისუფლება,“-აცხადებს აქციის ერთ-ერთი ორგანიზატორი ნოდარ რუხაძე.