„ქართული ოცნების“ ოფისთან აქცია გვიან ღამით დასრულდა. აქციის ორგანიზატორებმა მთავარი მოთხოვნები კიდევ ერთხელ გაახმოვანეს და ხელისუფლებას მათი ულტიმატუმის შესრულებისკენ მოუწოდეს.

„მოთხოვნები: 2020 წელს არჩევნები უნდა ჩატარდეს პროპორციული სისტემით, დაუყოვნებლივ უნდა გადადგეს საქართველოს შს მინისტრი, გიორგი გახარია, მესამე- სასწრაფოდ გათავისუფლდნენ უკანონოდ დაჭერილი ჩვენი დები და ძმები. მეოთხე, ადეკვატურად უნდა დაისაჯონ ის სამართალდამცველები, რომლებმაც გადაამეტეს უფლებამოსილებას,“ – განაცხადა გიგა მაქარსშვილმა.

აქციის მონაწილეები დღეს 19:00 საათზე, კვლავ პარლამენტის შენობასთან შეიკრიბებიან.

„მთელი ცივილური სამყარო ხვალ დილიდან იდგება ჩვენს გვერდით და ეს მთავრობა მოექცევა ძალიან დიდ წნეხში, წნეხში, რომელსაც ვერ გაუძლებს… მივდივართ, მშვიდობიანად იგივე გზით ვბრუნდებით… 19:00 საათზე ვბრუნდებით,“ – განაცხადა მაქარაშვილმა.

აქციის სპიკერმა, მიშა მშვილდაძემ აღნიშნა, რომ საზოგადოება ერთად დგას და მოსახლეობა მათი მოთხოვნების შესრულებას ითხოვს. მისი თქმით, თუ ხელისუფლება ულტიმატუმს არ შეასრულებს, ისინი სამოქმედო გეგმას შეიმუშავებენ.