უკრაინის პრეზიდენტმა, პეტრო პოროშენკომ ყირიმთან და დონბასთან განლაგებული უკრაინის შეიარაღებული ძალების დანაყოფების გაძლიერებულ საბრძოლო მზადყოფნაში მოყვანის შესახებ ბრძანება გასცა. ამის შესახებ პოროშენკო „ტვიტერის“ საკუთარ მიკრობლოგში წერს.„გავეცი ბრძანება ყირიმის ავტონომიურ რესპუბლიკასთან, ადმინისტრაციული საზღვრის რაიონებში, ასევე დონბასში, შეხების ხაზის მთელ პერიმეტრზე განლაგებული დანაყოფები გაძლიერებულ საბრძოლო მზადყოფნაში მოყვანის შესახებ“, – წერს პეტრო პოროშენკო.გუშინ რუსეთის უშიშროების ფედერალურმა სამსახურმა განაცხადა, რომ უწყებამ ყირიმში ტერაქტი აღკვეთა, რომელსაც უკრაინის თავდაცვის სამინისტროს მთავარი სადაზვერვო სამმართველო ამზადებდა.კერძოდ, 8 აგვისტოს რუსმა ძალოვნებმა „დივერსიულ-ტერორისტული“ ჯგუფების აქტივობა აღკვეთეს, რომლებიც ყირიმში შეღწევას ცდილობდნენ. ინციდენტს ორი რუსი სამხედრო ემსხვერპლა.აღნიშნულ ინფორმაციას გუშინვე რუსეთის პრეზიდენტი ვლადიმერ პუტინი გამოეხმაურა და განაცხადა, რომ კიევი პრობლემების მოლაპარაკებების გზით მოგვარების ნაცვლად, „ტერორს“ მიმართავს. თავის მხრივ, უკრაინის პრეზიდენტმა პეტრო პოროშენკომ აღნიშნულ ბრალდებას „ფანტაზია“ უწოდა, რომელსაც, მისი თქმით, მოსკოვი მუქარებისთვის იყენებს. პოროშენკომ აღნიშნა, რომ რუსეთი უკრაინის ტერიტორიაზე დიდიხანია აქტიურად აფინანსებს და მხარს უჭერს ტერორიზმს, ეს ეხება როგორც დონბასს, ისე ყირიმს. ევროპის საბჭოში უკრაინის ელჩი დიმიტრი კულება კი „ტვიტერის“ მიკრობლობში წერს, რომ პუტინის ეს განცხადება მიუთითებს, რომ მას „უფრო მეტი ომი სურს“ და უკრაინასთან ომის დასაწყებად მიზეზს ეძებს.