თურქული გამოცემა Yeni Safak ავრცელებს ინფორმაციას, რომ ერდოღანმა დაღუპული მეამბოხეებისთვის ცალკე სასაფლაო გააკეთებინა და მას Hainler Mezarlığı, ანუ "მოღალატეთა სასაფლაო" დაარქვა. სასაფლაო გაიხსნა სტამბოლის ერთერი რაიონის ფენდიქის ტერიტორიაზე. აქ პირველი დაიკრძალა ასმეთაური მეჰმეთ ქარაბექირი, რომელიც მეამბოხეთა მხარეს იბრძოდა და შეტაკებაში დაიღუპა.
სასაფლაოზე მისულმა სტამბოლის მერმა ქადირ თოფბაშმა პირდაპირ იქიდან მოუწოდა ხალხს მივიდნენ და დაწყევლონ მოღალატეები, რომელთაც სასიკვდილოდ გაიმეტეს თანამემამულეები, რათა მათმა სულმა ვერასოდეს ჰპოვოს მოსვენება და ჯოჯოხეთის ცეცხლში დაინთქას.
თურქეთის რელიგიის საქმეთა სამმართველომ აკრძალა რელიგიური რიტუალების ჩატარება დაღუპულ მეამბოხეთა დაკრძალვისას და მათი მოხსენიება ლოცვებში გარდაცვლილთათვის.