“ნაციონალური მოძრაობის” წარმომადგენლის ელენე ხოშტარიას განცხადებით, ექს-პრეზიდენტ მიხეილ სააკაშვილის პოლიტიკური მომავალი საზოგადოებამ უნდა განსაზღვროს და არა ბიძინა ივანიშვილმა და სხვა კონკრეტულმა პირებმა. მისი თქმით, მიხეილ სააკაშვილი “ნაციონალური მოძრაობის” წარმატებების მთავარი გენერატორი და დღეს უკვე რეგიონალური ლიდერია.

“ყველას კარგად უნდა ესმოდეს, რომ მიხეილ სააკაშვილი არის ამ პარტიის დამაარსებელი, პარტიის ძალიან ბევრი წარმატების მთავარი გენერატორი და ცხადია ლიდერი, რომელიც დღეს არის უკვე რეგიონალური მასშტაბის ლიდერი, რომელიც სხვათაშორის ემსახურება იმ საქმეს, რომელიც ჩვენთვის არის უპირველესად ძალიან მნიშვნელოვანი. უნდა გვესმოდეს ისიც, რომ მიხეილ სააკაშვილს და სხვა პოლიტიკურ დევნილებს აქვთ შეზღუდული საქართველოში ყოფნა და აქ არსებობა და პოლიტიკური მოღვაწეობა მათ შორის, ეს მთლიანად არა მხოლოდ ჩვენი პარტიისთვის, მთლიანად ქვეყნისთვის არის ძალიან ცუდი, მიხეილ სააკაშვილი იყო განდევნილი ქვეყნიდან და ეს არის ქვეყნის პრობლემა, მათი პოლიტიკური მომავალი განისაზღვრება საზოგადოების მიერ და არა რომელიმე კონკრეტული პიროვნების, ბიძინა ივანიშვილის, გავლენიანი პოლიტიკური ჯგუფის მიერ”,-განაცხადა ელენე ხოშტარიამ. 

 ამით, იმედია,  მან   წერტილი დაუსვა მითქმა–მოთქმას იმის შესახებ, რომ ნაციონალურ მოძრაობაში  შიდადაპირისპირებაა.

“პარტიაში დღეს არის ძალიან გახსნილი, დემოკრატიული პროცესი, სადაც ძალიან ბევრს შეიძლება ჰქონდეს სხვადასხვა მოსაზრება, თუმცა გადაწყვეტილებები მიიღება გარკვეული პროცედურით. ეს გადაწყვეტილებები არის ძალიან გამჭვირვალე, ძალიან დემოკრატიული. შესაბამისად, ერთიან და დემოკრატიულად მიღებულ გადაწყვეტილებაზე, ბუნებრივია, ყველა მივიღებთ მონაწილეობას,”- ამბობს ხოშტარია.

მათ კი ვინც , შესაძლოა არცთუ უსაფუძვლოდ, გაანაწყენა ელენე ხოშტარიას ადრინდელმა განცხადებამ, „მიმაჩნია, რომ მიხეილ სააკაშვილი ქართულ პოლიტიკაში არ უნდა ერეოდეს. ის არის უკრაინაში და მიხედოს უკრაინას“, ახლა აქვთ სრული საფუძველი მიიღონ ის რეალობა, რომ პოლიტიკური პარტია ცოცხალი ორგანიზმია, იმუნიტეტს იგი არამხოლოდ გარე ძალებთან ბრძოლაში, არამედ ცალკეული, ტაქტიკური, ზოგჯერ საკვანძო  საკითხების გარშემო მოსაზრებათა ჭიდილში და შიდადაპირისპირებაშიც იძენს, და  ეს საბოლოოდ მის გაძლიერებას ემსახურება.  ყურადსაღებია იმ მომენტის განსაკუთრებულობაც , როცა საქართველოში მიდინარე პროცესებიდან მიხეილ სააკაშვილის განრიდების საჭიროებაზე ითქვა – მაშინ ექსპერტი ელენე ხოშტარია   გამოეხმაურა უკრაინული სააგენტოს მიერ გავრცელებულ აუდიო ჩანაწერს, სადაც საქართველოს ყოფილი პრეზიდენტი მიხეილ სააკაშვილი, “რუსთავი 2“ -ის გენერალურ მდივანს, ნიკა გვარამიას და “ნაციონალური მოძრაობის“ გენმდივანს, გიგა ბოკერიას ესაუბრება. ამა თუ იმ მოსაზრების ანალიზი  დროისა და სიტუაციის  კონტექსტშიც უნდა ხდებოდეს – არსებობს სხვა ტექსტიც, რომელიც დაწერილს მიღმა იკითხება, მით უფრო პოლიტიკაში.