“რუსთავი 2”- ის ინფორმაციით, კორცხელის სკანდალური დაპირისპირების მონაწილეები გიგა ტყემალაძე და ნოშრევან წურწუმია მილანსა და ნიუ იორკში მოგზაურობენ.
შინაგან საქმეთა სამინისტრო მათ მიერ საზღვრის გადაკვეთაზე ოფიციალურ კომენტარს არ აკეთებს, თუმცა სატელეფონო საუბარში, ძალოვანი უწყების წარმომადგენლების განმარტებით, ბრალდებულებს არასაპატიმრო ღონისძიება – გირაო აქვთ შეფარდებული,
როგორც გაირკვა, პროკურატურას ჯგუფურ ხულიგნობაში ბრალდებულებისთვის ქვეყნიდან გასვლაზე შეზღუდვების დაწესება არ მოუთხოვია, მთავარი პირობა, ამ შემთხვევაში გამოძიების მოთხოვნისთანავე უწყებაში გამოცხადებაა, რაც მათ გადაადგილებაში ხელს არ უშლის
კორცხელის ინციდენტის მონაწილეების შესახებ დღეს ჟურნალისტების კითხვებს პრემიერმინისტრმა არ უპასუხა.
როგორც ჩანს, მან საკმარისად მიიჩნია კორცხელის ინციდენტთან დაკავშირებით გუშინ გაკეთებული განცხადება. ,, ერთადერთი კიდევ ერთხელ შემიძლია გითხრათ, რომ ჩვენ აბსოლუტურად მიუღებლად მიგვაჩნია ის, რაც მოხდა კორცხელში. ეს იყო ძალიან დიდი შეცდომა. ჩვენ პირადად ვიღებთ ამ პასუხისმგებლობას, რომ იქ უკეთესად უნდა დარეგულირებულიყო ადამიანების უსაფრთხოების საკითხი და რა თქმა უნდა, შესაბამისი პრევენციული ზომები ოქტომბრის არჩევნებისთვის გატარდება“, – განაცხადა კვირიკაშვილმა.