მეშვიდე დღეა უშედეგოდ ეძებენ გერმანიის მოქალაქეს , რომელიც 12 ივლისს გავიდა ზუგდიდიდან მესტიის მიმართულებით და უკვალოდ გაქრა, ვერ პოულობენ მის მანქანასაც, რომლითაც იგი საქმიან შეხვედრაზე მიემართებოდა. ადამიანი, ვინც მას ბოლოს ელაპარაკა ტელეფონით აცხადებს რომ სატელეფონო საუბრისას იგი ოკუპირებული ტერიტორიის სიახლოვეს იმყოფებოდა.
დაკარგული 65 წლის სერგეი სმისლოვია, ბიზნესმენი, სამშენებლო კომპანიის ხელმძღვანელი. იგი რეგიონში წყალ-საკანალიზაციო სამუშაოებს მეთვალყურეობდა. საქართველოში 2013 წლიდან იმყოფება. ოჯახი უბედური შემთხვევის ვერსიას გამორიცხავს, მათი ინფორმაციით, სმისლოვს თან სავარაუდოდ დიდი ოდენობით თანხა ჰქონდა.
„არავინ იცის როგორ დაიკარგა, ის უბრალოდ გაუჩინარდა. და კვალიც არსად ჩანს. . მას დაურეკა მეგობარმა ბადრიმ, 3 საათში უნდა ყოფილიყო ადგილზე, თუმცა როდესაც ბადრიმ ხელმეორედ დარეკა, მას ტელეფონი გამორთული ქონდა,“ – აცხადებს სმისლოვის შვილი. მეგობრებმა მისი ძებნა ღამითვე დაიწყეს, თუმცა უშედეგოდ.
საქმეზე გამოძიება დაწყებულია. შსს-ში აცხადებენ, რომ 276-ე მუხლით მიმდინარეობს ძიება, რაც ავტო საგზაო შემთხვევას გულისხმობს. სამეგრელო-ზემო სვანეთში დაკარგული ოჯახი სამართალდამცველებს თანამშრომლობისკენ მოუწოდებს და
დაკარგულის გაუჩინარების გარემოებათა დადგენის დაჩქარებას ითხოვს.