ზაზა ფირალიშვილმა ,,თავისუფალი დემოკრატები'' დატოვა. სოციალურ ქსელში პარტიის ყრილობის შემდეგ გავრცელებულ განცხადებაში პარტიის დატოვების მიზეზად იგი "გარკვეულ იდეოლოგიურ და ტაქტიკური წინააღმდეგობებს" და საკუთარ ცხოვრებისეულ რიტმს ასახელებს.
"იყო გარკვეული იდეოლოგიური და ტაქტიკური წინააღმდეგობებიც, იყო გაუგებრობაც, თუმცა კი ყველაფერი ეს დისკუსიას ექვემდებარებოდა. ყოფილ პარტნიორებთან ადამიანური ურთიერთობის გაფუჭების მიზეზი არა მაქვს. თუ ოდესმე ჩემი რჩევების საჭიროება ექნებათ, ცხადია, უარს არ ვეტყვი. არასოდეს არავისთვის მითქვამს უარი და მითუმეტეს, უარს ვერ ვეტყვი ყოფილ პარტნიორებს," – წერს ფირალიშვილი და დასძენს, რომ ამ პარტიას დღესაც ერთ-ერთ ყველაზე საინტერესო, ქვეყნის უკეთეს მომავალზე ორიენტირებულ პოლიტიკურ გუნდად მიიჩნევს.
ამასთან, ის სხვა რომელიმე პარტიაში და მათ შორის მმართველ გუნდში გაწევრიანებას გამორიცხავს.
"საგანგებოდ ვაცხადებ, რომ არ ვაპირებ რომელიმე სხვა, მითუმეტეს, სახელისუფლებო პოლიტიკურ გუნდში გადასვლას. დღესაც მაქვს ორიოდე საკმაოდ მომხიბლავი წინადადება, მაგრამ წმინდა მორალურ მოსაზრებებსაც რომ დავანებოთ თავი, პოლიტიკის გარეშეც მაქვს თვითრეალიზების სივრცე და ასეთი სალტო-მორტალეების საჭიროება არ გამაჩნია,“ – აცხადებს ზაზა ფირალიშვილი.