ქართველი მორაგბეები რეგიონებში ქალთა მიმართ ძალადობის წინააღმდეგ შეხვედრებს განაგრძობენ. დღეს ისინი სამეგრელოში, სოფელ ერგეტაში ადგილობრივ მოსახლეობას შეხვდნენ  და მათთან ქალთა მიმართ ძალადობის დაუშვებლობაზე ისაუბრეს. შეხვედრაში, რომელიც გაეროს ქალთა ორგანიზაციის მხარდაჭერით გაიმართა,  ვეტერანი ბორჯღალოსანი ნოდარ ანდღულაძე და საქართველოს მორაგბეთა ეროვნული ნაკრების წევრი მერაბ კვირიკაშვილი მონაწილეობდნენ.საქართველოს მორაგბეთა ეროვნული ნაკრები გაერთიანებული ერების ორგანიზაციის გენერალური მდივნის ბან კი მუნის კამპანიაში „გავერთიანდეთ ქალთა მიმართ ძალადობის წინააღმდეგ“ 2011 წლიდან აქტიურად მონაწილეობს. ამას გარდა, ბორჯღალოსნები ჩართულები არიან სოლიდარობის მოძრაობაში გენდერული თანასწორობისთვის HeForShe. ამ კამპანიების ფარგლებში მორაგბეები თბილისსა თუ რეგიონებში უფროსკლასელ ბიჭებს ხვდებიან და მათ თანასწორობაზე, ქალთა მიმართ ძალადობასთან ბრძოლის მნიშვნელობაზე ესაუბრებიან.„რაგბი და მორაგბეები საქართველოში ძალიან უყვართ. ვფიქრობ, რომ თითოეული მორაგბისა და სპორტსმენის ავტორიტეტის გამოყენება ისეთ პრობლემასთან ბრძოლაში, როგორიც ქალთა მიმართ ძალადობაა, ძალიან მნიშვნელოვანია. ჩვენ დიდი ხანია ამ კამპანიებში ვმონაწილეობთ და ყოველთვის მზად ვართ ასეთი ტიპის აქტივობებში ჩართვისთვის“,-აღნიშნავს მერაბ კვირიკაშვილი.მორაგბეთა შეხვედრები უფროსკლასელებთან   მთელი საქართველოს მასშტაბით მომავალშიც გაგრძელდება.