საქართველოს პრეზიდენტი პირველ ლედისთან და ქართულ დელეგაციასთან ერთად ბერლინში გაემგზავრა. პრეზიდენტის ადმიისტრაციის ცნობით, გიორგი მარგველაშვილი ვიზიტის ფარგლებში გერმანიის ფედერაციული რესპუბლიკის კანცლერს ანგელა მერკელს შეხვდება, ასევე დაგეგმილია შეხვედრები ბუნდესტაგის და ბუნდესრატის პრეზიდენტებთან.
მანამდე კი, უკვე დღეს , იგი სიტყვით გამოვა კონრად ადენაუერის ფონდში, თემაზე "საქართველოს ევროპული გზა“, და უპასუხებს მოწვეული სტუმრების შეკითხვებს .
ხვალ გიორგი მარგველაშვილი გერმანიის ფედერალურ პრეზიდენტს იოახიმ გაუკის შეხვდება. ბელვიუს სასახლეში პრეზიდენტის დახვედრის ოფიციალური ცერემონია გაიმართება, შეხვედრის დასრულების შემდეგ კი პრეზიდენტები მედიისთვის ერთობლივ განცხადებებს გააკეთებენ. ასევე დაგეგმილია საქართველოს პირველი ლედის მაკა ჩიჩუას შეხვედრა გერმანიის პირველ ლედისთან დანიელა შადტთან.
საქართველოს დელეგაციის შემადგენლობაში არიან მთავრობის, ეროვნული უშიშროების საბჭოს მდივანი, პრეზიდენტის ადმინისტრაციის, საპარლამენტო უმრავლესობისა და უმცირესობის წარმომადგენლები