ხმაური იყო დღეს ზუგდიდის რეფერალური საავადმყოფოს მიმღებში, სადაც  რამდენიმე საათის წინ ავტოსაგზაო შემთხვევის შედეგად დაზარალებული პაციენტის ახლობლები იმყოფებოდნენ. შემთხვევა ზუგდიდი-ანაკლიის ცენტრალურ გზაზე მოხდა,  სადაც თვითმხილველთა თქმით, 22 წლის მ. აქირთავას ავტომანქანა დაეჯახა. დაზარალებულის დედამთილი  ყვება,რომ ისინი: "ანაკლიიდან ორსანტიაში მიდიოდნენ, გზაზე, სადაც შემთხვევა მოხდა რძალთან და შვილიშვილთან ერთად ტროტუარზე ვიდექი, ბავშვი გაიქცა, დედამ ხელი სტაცა, გზიდან გადააგდო, თვითონ კი მანქანა დაეჯახა, ძალიან სწრაფად მოდიოდა, დამუხრუჭება ვერ შეძლო, მერე კიდევ გზაზე დაგვტოვა და წავიდა, პოლიციელია, ანაკლიის პოლიციის უფროსი პაპუნა დიდიშვილი…ალბათ ეჩქარებოდა, რძალი მომიკლა… ვითხოვთ დამნაშავე დააკავონ და ნარკოლოგიური შემოწმება ჩაუტარონ".- ამბობს ნინო ხაზალია. დაზარალებული ზუგდიდის რეფერალურ საავადმყოფოში გადმოიყვანეს, მორიგე ექიმის განმარტებით პაციენტის მდგომარეობა უმძიმესია,მას მრავლობითი მოტეხილობები აღენიშნება, დაზიანებული აქვს ხერხემალი,მუცლის ღღუ, ბარძაყის ძვალი და სხვა. ოჯახის წევრების ინიციატივით პაციენტი ქუთაისის ინტერვენციული მედიცინის ცენტრში გადაჰყავთ.