,,რის საფუძველზე ხდება გალის რაიონის მოსახლეობის გაწვევა აფხაზეთის რესპუბლიკის შეიარაღებულ ძალებში, თუკი აფხაზეთის რესპუბლიკის კანონში ,,სამხედრო ვალდებულებისა და სამხედრო სამსახურის შესახებ ‘’ ნათქვამია, რომ აფხაზეთის შეიარაღებულ ძალებში გაწვევა ეხება აფხაზეთის მოქალაქეებს?'' – ეს კითხვა დასვა ე.წ. აფხაზეთის პარლამენტის დეპუტატმა ახრა კვეკვესკირმა აფხაზეთის პარლამენტის გუშინდელ სხდომაზე, რომელზედაც განიხილებოდა ცვლილებები კანონში ,, აფხაზეთის რესპუბლიკაში უცხოეთის მოქალაქეთა სამართლებრივი მდგომარეობის შესახებ.’’

თუმცა დეპუტატის ეს შეკითხვა უპასუხოდ დარჩა, რადგან არც კოლეგებმა, და არც დიმიტრი შამბამ, რომელიც პრეზიდენტის წარმომადგენელია პარლამენტში,  უარი განაცხადეს ამ საკითხის გარშემო მსჯელობაზე იმ მიზეზით, რომ იგი არ არის ,,დღევანდელი სხდომის დღის წესრიგში.“

შეგახსენებთ, აფხაზეთში 2005 წლიდან მოქმედებს ,,კანონი მოქალაქეობის შესახებ'', რომლის თანახმად, სამხედრო სამსახურში გაიწვევიან მხოლოდ რუსეთისა და აფხაზეთის ორმაგი მოქალაქეობის მქონე პირები, თუმცა ამას წლების მანძილზე ხელი არ შეუშლია გალში მცხოვრები ახალგაზრდების გაწვევისათვის, მიუხედავად იმისა, რომ ისინი საქართველოს მოქალაქეები არიან.

უფრო მეტიც, დღემდე არ არის დახურული საქმე, რომელიც 2008 წელს აღიძრა  22 ქართველი ახალგაზრდის მიმართ სამხედრო სამსახურისთვის თავის არიდების მუხლით. ახრა კვეკვესკირი ერთი იმათთაგანია, რომელიც ამხელს ამ საქმის აბსურდულობას, რამდენადაც ეს ახალგაზრდები თავად მათი სამხედრო ნაწილის მეთაურმა გაუშვა ,,არასანდოობის'' მომიზეზებით, ხოლო შემდეგ სამხედრო პროკურატურამ დეზერტირებად გამოაცხადა ისინი. ახალგაზრდები დღემდე ძებნაში არიან.