საქართველოს ყოფილი პრემიერის, ბიძინა ივანიშვილის მოსაზრებით, პარლამენტის მომავალი თავმჯდომარის კანდიდატურაზე საუბარი ნაადრევია, – ამის შესახებ ბიძინა ივანიშვილმა “ტექნოპარკში” გამართულ პრესკონფერენციაზე განაცხადა.
კითხვაზე, თუ „ქართულმა ოცნებამ“ საპარლამენტო არჩევნებში გაიმარჯვა, ვინ წარმოუდგენია მას საქართველოს პარლამენტის თავმჯდომარედ – იქნება ის მოქმედი უმრავლესობის, ან მთავრობის რომელიმე წევრი, თუ ახალი სახე, ბიძინა ივანიშვილმა განაცხადა, რომ კითხვა ნაადრევია და „ქართული ოცნების“ ოფისში ჯერ მაჟორიტარობის საკითხს განიხილავენ.
„შემდგომ სია უნდა განმტკიცდეს. შემდეგ არჩევნებია. ალბათ უფრო გვიანდელ პროცესში გაირკვევა ვინ იქნება თავმჯდომარე. დღეს მგონი ცოტა ნაადრევია ამ თემაზე საუბარი“, – განაცხადა ბიძინა ივანიშვილმა.
ამით იგი გამოეხმაურა საქართველოს პრემიერ-მინისტრის, გიორგი კვირიკაშვილის დღევანდელ განცხადებას იმის შესახებ, რომ არჩევნების შემდეგ პარლამენტში დარჩენას არ აპირებს. „გუშინ ატყდა ერთი ამბავი ამ საკითხთან დაკავშირებით. მე არ ვაპირებ პარლამენტში დარჩენას. გამორიცხულია. მე ვაპირებ იმ თანამდებობაზე ყოფნას, სადაც დღეს ვარ, იმიტომ, რომ ძალიან ბევრი მნიშვნელოვანი საქმე გვაქვს გასაკეთებელი“, – განაცხადა გიორგი კვირიკაშვილმა.
გიორგი კვირიკაშვილმა ეს გამცხადება გააკეთა გუშინ გავრცელებულ იმ ინფორმაციასთან დაკავშირებით, რომლის მიხედვითაც არჩევნების შემდეგ იგი შესაძლოა პარლამენტის თავმჯდომარედ აირჩიონ.