დღეს თომას ჰამერბერგი დამოუკიდებელი ექსპერტის რანგში აფხაზეთის რეგიონში მიემგზავრება. რათა ადგილზე გაეცნოს ადამიანის უფლებების კუთხით არსებულ მდგომარეობას, ასევე შეისწავლოს 19 მაისს ხურჩაში გიგა ოთხოზორიას მკვლელობასთან დაკავშირებული გარემოებები. იგი სამხრეთ კავკასიასა და საქართველოში კრიზისის საკითხებში ევროკავშირის სპეციალური წარმომადგენლის, ჰერბერტ ზალბერის დავალებით, შეაფასებს აფხაზეთის რეგიონში არსებულ ვითარებას ადამიანის უფლებების დაცვის კუთხით.
ჰამერბერგი აფხაზეთში გამგზავრებამდე საქართველოს პრემიერ-მინისტრს შეხვდა. გიორგი კვირიკაშვილმა კიდევ ერთხელ გაუსვა ხაზი დამნაშავის დაუყოვნებლივ დაპატიმრების აუცილებლობას და აღნიშნა, რომ ასეთი სასტიკი დანაშაული დაუსჯელი არ უნდა დარჩეს.
თომას ჰამარბერგი საკუთარი მანდატის ფარგლებში, აფხაზეთის რეგიონში კიდევ ერთხელ, შემოდგომაზე დაბრუნდება, რის შემდეგაც, სამხრეთ კავკასიასა და საქართველოში კრიზისის საკითხებში ევროკავშირის სპეციალური წარმომადგენლისთვის, აფხაზეთში ადამიანის უფლებების მდგომარეობის შესახებ ანგარიშს მოამზადებს. ანგარიშში ასევე იქნება რეკომენდაციები.