თურქეთის პრეზიდენტმა რეჯეპ ტაიპ ერდოღანმა სტამბოლში დღეს მომხდარ აფეთქებაზე პასუხისმგებლობა დააკისრა ქურთების მუშათა პარტიას, რომლებიც ქურთების ავტონომიას ითხოვენ. თურქეთის ლიდერის თქმით, მისი ქვეყანა ტერორისტების წინააღმდეგ ბრძოლას გააგრძელებს იქამდე, სანამ გამარჯვებას არ მიაღწევს.
აფეთქება დღეს დილით, პიკის საათის დროს მოხდა სტამბოლის ცენტრში, ტურისტებში პოპულარულ ბაიაზეთის კვარტალში, კერძოდ, ბეზნეჯილერის ავტობუსის გაჩერებაზე , რომელიც პოლიციის განყოფილებასთან უშუალო სიახლოვეს მდებარეობს. აფეთქებამ 11 ადამიანის სიცოცხლე იმსხვერპლა, მათ შორის 7 პოლიციელია, 4 – ჩვეულებრივი გამვლელი. დაჭრილია ,36 ადამიანი კი, მათ შორის 14 პოლიციის თანამშრომელია. თვითმხილველთა ცნობით, აფეთქება მოხდა მაშინ, როცა გაჩერებასთან პოლიციელთა ავტობუსი გადიოდა. ლაპარაკობენ იმაზეც, რომ აფეთქების კვალდაკვალ სროლებიც გაისმა. წინასწარი მონაცემებით, ასაფეთქებელი მოწყობილობა დისტანციურად იმართებოდა. მთ;იანად დამწვარია ავტობუსი, დაზიანებულია ახლომდებარე შენობების ფასადები.