მოსამართლეთა გადაწყვეტილება, არ დაეშვათ ტელეკომპანია რუსთავი2-ის გენერალური დირექტორი ნიკა გვარამია და ტელეკომპანიის ადვოკატები თამთა მურადაშვილი და დიმიტრი საძაგლიშვილი სხდომაზე, პოლიტიკოსებმა გააპროტესტეს.
მათ სხდომათა დარბაზი პროტესტის ნიშნად დატოვეს.
თავისუფალი დემოკრატების ერთ-ერთი ლიდერი ნინო გოგუაძე, სააპელაციო სასამართლოს მოსამართლეებს მოსამართლის როლის შემსრულებლებს უწოდებს.
„ჩვენ ძალიან კარგად ვიცით, რომ ეს სასამართლო არ არის. უბრალოდ გვაინტერესებს, რა ტექსტი იწერება ხოლმე, მაგრამ 10-15 წუთში ისეთი უსამართლობის გრძნობა გვეუფლება ხოლმე, რომ გამოვდივართ პროტესტის ნიშნად,“ – განაცხადა გოგუაძემ.
სააპელაციო სასამართლოში მიმდინარე პროცესს სასამართლოს იმიტაციას უწოდებენ ნაციონალური მოძრაობის წევრები.
„დღეს მათ არ სჭირდებათ არავინ დარბაზში, არ უნდა იმყოფებოდეს რუსთავი 2-ის წარმომდგენელი, არ უნდა იმყოფებოდეს ასევე ადვოკატი. დღეს ფაქტობრივად დარბაზში ისმის ერთი ხმა, ეს არის ხელისუფლების ხმა, ეს არის ბიძინა ივანიშვილის ხმა,“-განაცხადა სერგო რატიანმა.
პოლიტიკურად მოტივირებულ პროცესზე საუბრობს ახალი მემარჯვენეების ერთ-ერთი ლიდერიც. მანანა ნაჭყებიას განცხადებით, ქიბარ ხალვაშის გადაწყვეტილება, უარი ეთქვა სააპელაციო საჩივარზე, წინასწარ იყო გათვლილი.