დღეს ბრიუსელში მეორედ იმსჯელებენ საქართველოს ვიზალიბერალიზაციაზე – საკითხი ევროკავშირის მუდმივი წარმომადგენლების დონეზე, დახურულ შეხვედრაზე განიხილება.
ევროკავშირის ელჩებმა ამ საკითხზე ერთი კვირის წინაც იმსჯელეს, თუმცა ვერ შეთანხმდნენ. თუ ევროკავშირის ელჩები დეტალებს ვერც ამჯერად შეაჯერებენ, შესაძლოა დისკუსია გაიმართოს უკვე ევროკავშირის წევრი ქვეყნების შინაგან საქმეთა და იუსტიციის მინისტრების შეხვედრაზე, რომელიც ბრიუსელში 9 ივნისს გაიმართება.
საქართველოს საპარლამენტო უმრავლესობის ლიდერი ზვიად კვაჭანტირაძე იმედოვნებს, რომ დღევანდელ შეხვედრაზე საქართველოს მიერ შესრულებულ ვალდებულებებს გაითვალისწინებენ და პროცესი არ გაჭიანურდება. თუმცა დასძენს, რომ „ზედმეტი მოლოდინები რომ არ შევქმნათ, მაინც უნდა დაველოდოთ პროცესების განვითარებას,“
საქართველოსთვის ვიზალიბერალიზაციის მინიჭების საკითხზე შეფასებები გაკეთდა ოპოზიციაშიც.
ნაციონალური მოძრაობის წევრმა ელენე ხოშტარიამ განაცხადა, რომ რუსთავი 2-ის გარშემო მიმდინარე პროცესები საფრთხეს უქმნის ამ საკითხის გადაწყვეტას.