ერთ საათზე მეტია, რაც ქართული მხარის დელეგაციამ ენგურის ხიდი გადაკვეთა და ოკუპირებულ ტერიტორიაზე იმყოფება. გალში მიმდინარეობს ოთხმხრივი შეხვედრა ინციდენტების პრევენციისა და მათზე რეაგირების მექანიზმის ფარგლებში. ქართული დელეგაციის შემადგენლობაშია სახელმწიფო უსაფრთხოების სამსახურის ანალიტიკური დეპარტამენტის ხელმძღვანელი ირაკლი ბერაია, ასევე შერიგებისა და სამოქალაქო თანასწორობის საკითხებში სამინისტროს წარმომადგენელი . მათთან ერთად იმყოფება ეუთოს წარმომადგენელი. დელეგაციის წევრებს ენგურის ხიდის გადაკვეთისას კომენტარები არ გაუკეთებიათ.
საგარეო საქმეთა სამინისტროს ინფორმაციით, შეხვედრაზე მთავარი განსახილველი საკითხი 19 მაისს, სამეგრელო-აფხაზეთის ადმინისტრაციულ საზღვართან გიგა ოთხოზორიას მკვლელობა იქნება.
შეგახსენებთ, ეს არის პირველი ასეთი შეხვედრა ოთხწლიანი პაუზის შემდეგ, გალის შეხვედრები 2012 წელს აფხაზური მხარის გადაწყვეტილებით შეწყდა. აფხაზურმა მხარემ მისიის ყოფილი ხელმძღვანელი ევროკავშირიდან საქართველოში, ანჯეი ტიშკევიჩი აფხაზეთის ტერიტორიაზე არასასურველ პირად გამოაცხადა.