სამართალდამცავებმა თბილისში  10 ლგბტ აქტივისტი დააკავეს.  მათი  ნაწილი საპატრიარქოს შენობის ღობის კედელზე, ნაწილი კი რუსთაველის გამზირზე წარწერების – „სიყვარული თანასწორია” გაკეთების დროს დააკავეს. 

„ლგბტ საქართველოს“ აღმასრულებელი დირექტორის ლევან ბერიანიძის  განცხადებით,  დაკავებისას ადგილი ჰქონდა უხეშ მოპყრობას. მისივე ცნობით, დაკავებულები პოლიციის განყოფილებაში ჰყავთ.

შინაგან საქმეთა სამინისტროში აცხადებენ, რომ ლგბტ აქტივისტები დაკავებულები არიან ადმინისტრაციულ სამართალდარღვევათა კოდექსის 150-ე მუხლის მიხედვით, რაც გულისხმობს სხვადასხვა სახის წარწერების, ნახატებისა და სიმბოლოების თვითნებურ შესრულებას შენობების ფასადებზე, ღობეებზე და ა.შ. სამართალდარღვევა პირველ ჯერზე 50-ლარიან ჯარიმას ითვალისწინებს.შსს-ს ინფორმაციით, დაკავებულთა ნაწილს ასევე ედავებიან ადმინისტრაციულ სამართალდარღვევათა კოდექსის 173-ე მუხლის დარღვევას. აღნიშნული მუხლი გულისხმობს პოლიციელისადმი დაუმორჩილებლობას, რაც იწვევს დაჯარიმებას 400 ლარის ოდენობით ან გამასწორებელ სამუშაოებს ერთიდან ექვს თვემდე ვადით, ხელფასიდან 20%-ის დაქვითვით, ხოლო თუ საქმის გარემოებათა და დამრღვევის პიროვნების გათვალისწინებით ამ ზომების გამოყენება არასაკმარისად იქნება მიჩნეული, ადმინისტრაციულ პატიმრობას 90 დღემდე ვადით.

დღეს, 17 მაისს მსოფლიოში ჰომოფობიასთან ბრძოლის საერთაშორისო დღე აღინიშნება. მანამდე ლგბტ აქტივისტების დამოუკიდებელმა ჯგუფმა გაავრცელა განცხადება, რომელშიც ნათქვამია, რომ მიღებულ იქნა გადაწყვეტილება აღარ მოაწყონ დაგეგმილი შეკრება, რადგან   ხელისუფლებამ ვერ უზრუნველყო რუსთაველის გამზირზე უსაფრთხოდ შეკრების გარანტია.