სავარაუდოდ, ნაციონალური მოძრაობის მიერ დღევანდელ პრესკონფერენციაზე დაგეგმილი საარჩევნო სიის პრეზენტაციის შემდეგ გაირკვევა, იქნებიან თუ არა გამსვლელ სიაში პარტიის ზუგდიდის ორგანიზაციის მიერ დასახელებული დეპუტატობის კანდიდატები: თენგიზ გუნავა, ლაშა დამენია, ლელა ქებურია, ლევან კონჯარია, ბესარიონ წერედიანი.
ამ კანდიდატურების შერჩევა მოხდა სამეგრელოს რეგიონულ კონფერენციაზე, რომელიც 15 მაისს შედგა. კონფერენციას ესწრებოდა რეგიონში არსებული ადგილობრივი ორგანიზაციების 23 დელეგატი და და სათაო ოფისის წარმომადგენლები – კერძოდ, პარტიის სამდივნოს ორი წარმომადგენელი, მიხეილ მაჭავარიანი, ხათუნა გოგორიშვილი და რეგიონის კურატორი. პარტიის ადგილობრივი ორგანიზაციის თავმჯდომარის ლაშა დამენიას განმარტებით, შეხვედრა ჩატარდა მედიისათვის დახურულ რეჟიმში, რადგან პოლიტსაბჭოს მიერ ერთიანი სიის დაკომპლექტების პროცესში ზოგი რამ კიდევ შეძლება შეიცვალოს.
ორგანიზაციაში აცხადებენ, რომ კანდიდატების შერჩევა მოხდა მათი საქმიანი თვისებებისა და დამსახურების, დასავლური ღირებულებებისადმი ერთგულებისა და პარტიის სხვა პრინციპებთან შესაბამისობის ნიშნით.
შეგახსენებთ, ადგილობრივი ორგანიზაციის მიერ წარდგენილ კანდიდატურებს არაერთგვაროვნად აფასებენ სოციალურ ქსელებში, განსაკუთრებული კრიტიკის ობიექტი გახდა ერთერთი მათგანი, რომელსაც ნაკლებად მკვეთრ პოზიციას და არასაკმარის აქტიურობას უწუნებენ ენმ – სათვის ყველაზე კრიტიკულ პერიოდში წინა არჩევნების შემდეგ. ინტერნეტმომხმარებელთა შორის საკმაოდ ბევრნი აღმოჩნდნენ ისეთებიც, ვისთვისაც გაუგებარია, როგორ არ მოხვდა ამ სიაში ახალგაზრდა მზარდი პოლიტიკოსი ქალი ანი წითლიძე, რომელიც სხვა თვისებებთან ერთად აქტიურობის მაღალი კოეფიციენტით გამოირჩევა.