ნუ ატლიკინებ ენას. გადი აქედან დროზე, სანამ მართლა ჩიორა ხარ, – ასე მიმართა ადამიანის უფლებათა დაცვის კომიტეტის თავმჯდომარე ეკა ბესელიამ ”ნაციონალების” წევრ დეპუტატ ჩიორა თაქთაქიშვილს მას შემდეგ, რაც მათ შორის სიტყვიერი დაპირისპირების შემდეგ პარლამენტში ორი კომიტეტის გაერთიანებული სხდომა ჩაიშალა.
თაქთაქიშვილმა ბესელიას, რომლის გადაწყვეტილებითაც სხდომა შეწყდა, საკომიტეტო განხილვის გაგრძელება მოსთხოვა და თავად მას მოუწოდა, დაეტოვებინა დარბაზი, სხდომას კი, როგორც ადამიანის უფლებათა დაცვის კომიტეტის თავმჯდომარის მოადგილე ის გააგრძელებდა.
”მე გავაგრძელებ სხდომას, რადგან აქ არ მოვსულვარ თქვენთან დებატებისთვის, აქ მოვედი ”ახალგაზრდა იურისტთა ასოციაციისა” და საერთაშორისო გამჭვირვალობა საქართველოს” მიერ მომზადებული ანგარიშის გასაცნობად. თქვენ გინდათ მოახდინოთ პროცესის პოლიტიზება და ის შეიყვანეთ ამ ჭრილში. კეთილი ინებეთ, შეასრულეთ თქვენი უფლებამოსილება და წაიყვანეთ სხდომა”, – მიმართა თაქთაქიშვილმა ბესელიას.
თავის მხრივ, ბესელიამ თაქთაქიშვილს ურჩია საკუთარი უფლებამოსილების შესრულება.
”შენ შეასრულე შენი უფლებამოსილება. ვერაფერს ვერ გავაგრძელებ. გაიყვანეთ ქალბატონი ჩიორა აქედან – გაძევებულია სხდომიდან”, – აღნიშნა ბესელიამ.
ადამიანის უფლებათა დაცვის კომიტეტის თავმჯდომარის ამ განცხადებაზე საპასუხოდ, ”ნაციონალების” წევრმა დეპუტატმა კვლავ განაცხადა, რომ მზად იყო სხდომას თავად გაძღოლოდა, თუმცა ბესელიამ თაქთაქიშვილს ამის უფლება არ მისცა.
”თქვენ თუ გაბრძანდებით, მე გავაგრძელებ სხდომას, როგორც თქვენი მოადგილე. გაბრძანდით და მოგვეცით საშუალება მოვისმინოთ ანგარიში”, – მიმართა თაქთაქიშვილმა ბესელიას.
თავის მხრივ, ბესელიამ თაქთაქიშვილს ”სასაცილო” უწოდა.
”ნუ ატლიკინებ ენას. გადი ახლა აქედან ჩიორა დროზე, სანამ მართლა ჩიორა ხარ”, – უპასუხა ბესელიამ თაქთაქიშვილს.
საბოლოოდ, კომიტეტის სხდომა, რომელზეც არასამთავრობო სექტორის მიერ იუსტიციის უმაღლესი საბჭოს საქმიანობის შესახებ მომზადებულ ანგარიშს განიხილავდნენ, არ განახლებულა. ბესელიამ სხდომის შეწყვეტის გამო ანგარიშის ავტორებს ბოდიში მოუხადა და განაცხადა, რომ პასუხისმგებლობა ”მასკარადისთვის” ამ ქალბატონმა (ჩიორა თაქთაქიშვილი) უნდა აიღოს”.
ინტერპრესნიუსი