ლტოლვილთა და განსახლების მინისტრის მოადგილეებმა შოთა რეხვიაშვილმა და მამუკა ცოტნიაშვილმა დღეს ზუგდიდში, თაბუკაშვილის ქუჩაზე, დევნილთა კომპაქტურ ჩასახლებაში მაცხოვრებლებს შეხვდნენ და დაბინძურებული სასმელი წყლის პრობლემასთან დაკავშირებით განმარტებები გააკეთეს. რეხვიაშვილის განცხადებით, გამოთქმული მოსაზრება, რომ წყლის დაბინძურება კანალიზაციის მილის დაზიანებამ გამოიწვია მცარია. მინისტრის მოადგილის განცხადებით, წყალზე აღებული სინჯებით ირკვევა, რომ არსებობს გრუნტის წყლებიდან გარკვეული დაბინძურება და ნაწლავური ჩხირის პრობლემა. როგორც ლტოლვილთა და განსახლების სამინისტროს წარმომადგენლებმა განაცხადეს, აღნიშნულთან დაკავშირებით საკითხის მოგვარება საჭირო ტექნოლოგიის დაცვით წარიმართება.
შეგახსენებთ, რომ ზუგდიდის მუნიციპალიტეტის საზოგადოებრივი ჯანდაცვის ცენტრის მიერ გამოქვეყნებული დასკვნის თანახმად, თაბუკაშვილის ქუჩაზე დევნილთა ახალ ჩასახლებაში წყლის დაბინძურების შედეგად 111 ადამიანი დაავადდა, აქედან 40 მცირეწლოვანია. ინფექციის პირველი შემთხვევა 7 აპრილს გამოვლინდა.
ამასთან, არასამთავრობო ორგანიზაცია "საუნჯე" მოუწოდებს პროკურატურას დაიწყოს გამოძიება წყლის დაბინძურებასთან დაკავშირებით და ამასთან, შეისწავლოს თუ რა სახის სამუშაოები ჩატარდა და რაში დაიხარჯა თანხები. ორგანიზაციის თავმჯდომარე იაგო ფასანძე ასევე ქვეყნის პრემიერ-მინისტრს მოუწოდეს დროულად დაინტერესდეთ აღნიშნული პრობლემით.