საინფორმაციო სააგენტო апсны ру აფხაზეთის დე ფაქტო უშიშროების სახელმწიფო სამსახურის ოფიციალურ ინფორმაციაზე დაყრდნობით წერს რომ აფხაზმა ძალოვნებმა დააკავეს საქართველოს ორი მოქალაქე, ზუგდიდის რაიონის მკვიდრები – 1986 წ. დაბ. შოთა ანზორის ძე ბულია და 1988 წელს დაბ. ირაკლი ბერდიას ძე ჯაპავა .
«დაკავებულებმა უკანონოდ (შესაბამისი საშვების გარეშე, ოფიციალური საკონტროლო-გამშვები პუნქტის გვერდის ავლით) გადაკვეთეს აფხაზეთის რესპუბლიკის სახელმწიფო საზღვარი მდინარე ენგურის გავლით. ამასთანავე, უშიშროების სამსახური ფლობს ოპერატიულ ინფორმაციას იმის შესახებ, რომ მათ მიერ დაგეგმილი იყო რიგი დანაშაულების ჩადენა. გარდა ამისა, ექსპერტიზის დასკვნით, დაკავების მომენტში ზემოაღნიშნული პირები ნარკოტიკული საშუალება «მეტადონის» ზემოქმედების ქვეშ იმყოფებოდნენ» – აღნიშნულია დე ფაქტო უშიშროების სამსახურის მიერ გავრცელებულ ინფორმაციაში.
სოხუმის სასამართლოს გადაწყვეტილებით, დაკავებულები 15 დღე-ღამით საგამოძიებო იზოლატორში მოათავსეს და მათ მიმართ საგამოძიებო მოქმედებები გრძელდება.