ჰაერში გაშვებული ფრანები,ფოიერვერკები და აქციის ნიღბიანი მონაწილეები – ამ ფორმით მოქალაქეებმა ზუგდიდის შალვა დადიანის სახელობის სახელმწიფო დრამატულ თეატრს დაარსებიდან 148 -ე წელი მიულოცეს. ღონისძიება ორგანიზატორებმა სოციალურ ქსელ ფეისბუქის მეშვეობით დაგეგმეს და თეატრის წინ შეიკრიბნენ. ამჟამად, საუკუნოვანი კულტურული დაწესებულება ნგრევის პირასაა, აქ თეატრალური წარმოდგენები შენობის ავარიული მდგომარეობიდან გამომდინარე დროებით შეჩერებულია. ცოტა ხნის წინ ლევან სამხარაულის სახელობის ექსპერტიზის ეროვნულმა ბიურომ დასკვნა გამოაქვეყნა, რომლის თანახმად თეატრის შენობა რეკონსტრუქციას ექვემდებარება. აქციის მონაწილეები იმედს გამოთქვამენ, რომ კულტურული დაწესებულება საიუბილეო 150 წლისთავს განახლებულ გარემოში შეხვდება.
მოქალაქეების თეატრალიზებულ აქციას ზუგდიდის თეატრის სამხატვრო ხელმძღვანელი და დასის წევრებიც შეუერთდნენ. ბადრი წერედიანი იმედს გამოთქვამს, რომ თეატრის რეკონსტრუქცია მალე დაიწყება და აქ კულტურული წარმოდგენებიც განახლდება.
ამჟამად თეატრში სრული სიჩუმეა. კულტურულ დაწესებულებაში სიჩუმეს მხოლოდ თეატრალური დასის რეპეტიციები არღვევს. თეატრალური წარმოდგენა მთავარი დარბაზის ავარიული მდგომარეობის გამო დაკეტილია, გარეთ დამონტაჟებული აფიშა მაყურებელს მაინც ჯიუტად 148 -ე თეატრალურ სეზონზე ეპატიჟება.