მიხეილ სააკაშვილი უკრაინაში მიმდინარე პოლიტიკურ მოვლენებს საგანგებო პრესკონფერენციაზე გამოეხმაურა. ოდესის გუბერნატორმა პრეზიდენტ პოროშენკოს მთელი რიგი მოთხოვნები წაუყენა – ხალხის ნდობით აღჭურვილი მთავრობის ფორმირებას და რადიკალური რეფორმების გატარება და ამ პირობების შეუსრულებლობის შემთხვევაში გუბერნატორობიდან გადადგომითა და რეფორმატორთა გუნდის მიერ პოსტებიდან წასვლით დაემუქრა.
სააკაშვილის თქმით, მხოლოდ არსენი იაცენუკის გადადგომით, უკრაინაში კორუფციის პრობლემას ვერ მოგვარდება. პრობლემები არამხოლოდ იაცენიუკის, არამედ უკრაინის პრეზიდენტის მიდგომებში და მის გარშემო მყოფთა ხედვაშიცაა.
„დავიღალეთ ცარიელი დაპირებების მოსმენით, როდესაც ძველი კორუმპირებული სისტემა ნაბიჯ–ნაბიჯ რევანშისკენ მიდის. უკრაინას სჭირდება სასწრაფო და რადიკალური რეფორმები. პრეზიდენტის უფლებამოსილებაში შედის ამ რეფორმების უზრუნველყოფა.
ჩვენ გვაქვს მოთხოვნები, რომლიც აუცილებელია ჯანსაღი განვითარებისთვის, როგორც ოდესის ოლქში, ასევე მთელს უკრაინაში. მოვითხოვთ, შეიქმნას ხალხის ნდობით აღჭურვილი მთავრობა. ვითხოვთ ოდესის მთავარი პროკურორის, სეპარატისტი და ოლიგარქი სტოიანოვის თანამდებობიდან მოხსნას. დაუყოვნებლივ აღიძრას სისხლის სამართლის საქმე ოდესის მერის წინააღმდეგ მის ოფშორულ კომპანიებთან და რუსეთის მოქალაქეობასთან დაკავშირებით. თანამდებობიდან გათავისუფლდნენ უკრაინის უსაფრთხოების სამსახურისა და სახელმწიფო ფისკალური სამსახურის ხელმძღვანელები, ისინი ვინც უკრაინელი ხალხის ინტერესების დასაცავად კი არ იბრძვის, არამედ ძარცვასა და ბანდიტიზმშია ჩართული. ჩვენ ლოდინს აღარ ვაპირებთ, ჩვენ შევცვლით არსებულ სისტემას დღევანდელი ხელისუფლებით ან მის გარეშე,“ – განაცხადა მიხეილ სააკაშვილმა.