ანაკლიის პორტის მშენებელი კონსორციუმის ქვეკონტრაქტორი კომპანია „გეოგრაფიკის“ ხელმძღვანელობას სამეგრელო-ზემო სვანეთის გუბერნატორი ლევან შონია ადგილობრივი მთავრობის წარმომადგენლებთან ერთად შეხვდა.
გუბერნატორმა „გეოგრაფიკის“ წარმომადგენლებისგან მიმდინარე სამუშაოების შესახებ ინფორმაცია მოისმინა. კომპანიამ ის მიწის ნაკვეთები და შენობა ნაგებობები აღწერა რომლებიც ანაკლიის ღრმაწყლოვანი პორტის და მისი ინფრასტრუქტურის ფარგლებში ექცევა. ასეთი კი ათასამდე მიწის ნაკვეთი და 400-მდე შენობა ნაგებობაა, აქედან საცხოვრებელი 110-მდე ობიექტია.
გუბერნატორის განცხადებით, არცერთი მესაკუთრე შესაბაისი კომპენსაციის გარეშე არ დარჩება და დრო როდესაც მოქალაქეებს მიწებს და საკუთრებას ართმევდნენ წარსულს ჩაბარდა.
შეხვედრას ზუგდიდის მუნიციპალიტეტის გამგებელი, გუბერნატორის ადმინისტრაციის რეგიონული პროექტების კოორდინირების სამსახურის უფროსი, ეკონომიკის სამინისტროს, დევნილთა სამინისტროს, სოციალური მომსახურეობის სააგენტოს წარმომადგენლები, ანაკლიის და ერგეტას სოფლის რწმუნებულები ესწრებოდნენ.