ქალაქ ზუგდიდის ვიცე-მერი, გია გულორდავა ერთიანი ნაციონალური მოძრაობის წევრ ნუგზარ წიკლაურისგან ბოდიშის მოხდას მოითხოვს. ამის შესახებ დღეს თავად მიცე მერმა მედიისთვის გამართულ სპეციალურ ბრიფინგზე განაცხადა. გია გულორდავა მზადაა გამოთქმული ბრალდებების გამო სამართალდამცავებთანაც ითანამშრომლოს იმ მოტივით, რომ დადგინდეს სიმართლე.
„მოგმართვთ, რომ საკითხის შესწავლის მიზნით პირადად ჩამოხვიდეთ ზუგდიდში, რათა გაარკვიოთ სიმართლე და როცა მას დაადგენთ, ბოდიში მომიხადეთ პარლამენტის ტრიბუნიდან. შეცდომის აღიარება და ბოდიშის მოხდა ღირსეული საქციელია და ვაჟკაცთა ხვედრია. მე არ ვიცი თქვენი დღევანდელი მორალური თუ ზნეობრივი მდგომარეობა მოგცემთ თუ არა ამის საშუალებას. მე ვიცი, რომ მეგობრები და ახლობლები ბოცოს გეძახიან. თუ ისევ ის ძველი ბოცო ხართ და არა ნაბოცვარი, მაშინ ალბათ თქვენი ღირსების შესაბამისად მოიქცევით. მეარვიმუქრები. უბრალოდ, ყველას უნდა გვახსოვდეს, უნდა ვიცხოვროთ და ვიმუშაოთ ისე, რომ არ გვეშინოდეს, ვინმე სადმე არ გადაგვეყაროს და შესაბამისი პასუხი არ მივიღოთ ჩადენილი ქმედებებისათვის,“ – განაცხადა ქალაქ ზუგდიდის ვიცე-მერმა გია გულორდავამ მედიისთვის გამართულ ბრიფინგზე.
გულორდავა ამბობს, რომ აღნიშნულ საკითხზე საქართველოს პარლამენტის საპროცედურო საკითხთა და წესების კომიტეტს მიმართა და დეპუტატ ნუგზარ წიკლაურისგან ბოდიშის მოხდა მოითხოვა. ვიცე მერის განმარტებით, მან კომიტეტისგან მიიღო პასუხი, რომ ეს არ იყო მათი კომპეტენცია და ისინი ვერ მიუთითებდნენ პარლამენტარს მის ქმედებაზე.
„კომიტეტისგან მივიღე პასუხი, რომ ეს მათი კომპეტენცია არ არის და ვერ მიუთითებენ პარლამენტარს მსგავსი ქმედებების გამო. მათ მირჩიეს, რომ სასამართლოსთვის მიმემართა“- განაცხადა გია გულორდავამ. მისივე ინფორმაციით, აღნიშნულთან დაკავშირებით სასამართლოსთვის მიმართვას არ აპირებს.
საქართველოს პარლამენტის წევრმა „ერთიანი ნაციონალური მოძრაობიდან“ ნუგზარ წიკლაურმა 16 მარტს სპეციალურ ბრიფინგზე განაცხადა, რომ ზუგდიდში, ტროტუარებზე ფილების დამგები კომპანიის გამოვლენაში აქტიურ მონაწილეობას ქალაქ ზუგდიდის ვიცე-მერი გია გულორდავა იღებდა. დეპუტატის ინფორმაციით, ვიცე-მერმა მუშებს საკუთარ სახლშიც დააგებინე ფილები.