ცოტა ხნის წინ რესპუბლიკელების ლიდერებმა პარტიის ოფისში გამართულ საგანგებო ბრიფინგზე გააკეთეს განცხადება, რომ რესპუბლიკელები არჩევნებში დამოუკიდებლად მიიღებენ მონაწილეობას, თუმცა ამ ეტაპზე კოალიციაში რჩებიან და ინარჩუნებენ მინისტრების პოსტებს.
მათი განმარტებით, ეს გადაწყვეტიელება არ ნიშნავს დაუყოვნებლივ გასვლას კოალიცია ,,ქართული ოცნებიდან" , საპარლამენტო უმრავლესობიდან, მთავრობიდან და ადგილებზე საკრებულოების უმრავლესობიდან. მათი თქმით, ეს საკითხები ეტაპობრივად გადაწყდება.
"ეს დამოკიდებული იქნება შემდეგ ფაქტორებზე – სამთავრობო თანამდებობს დავტოვებთ მხოლოდ საკუთარი პოლიტიკური დღის წესრიგის ან პრემიერმინისტრის გადაწყვეტილების გამო და არავითარ შემთხვევაში ოკუპანტი ქვეყნის, ადგილობრივი სტალინელების, ვიდეო შანტაჟისტების ან ანტი ნატოელების ულტიმატუმების ფონზე," – განაცხადა პარტიის თავმჯდომარემ ხათუნა სამნიძემ.
პარტიის ლიდერები აცხადებენ, რომ შემდგომი თანამშრომლობა დამოკიდებული იქნება იმაზეც, რამდენად შეძლებს პარტია ,,ქართული ოცნება'' დაანონსებულ განახლებას.
" ჩვენი თანამშრომლობა ნამდვილად ვერ იქნება შესაძლებელი, თუ პოლიტიკური დღის წესრიგის განმსაზღვრელი კვლავ იქნება თავისუფალ რეჟიმში მოქმედი ინდივიდების საჯარო განცხადებები," – აღნიშნა ხათუნა სამნიძემ. თუმცა ვეცდებით , რომ ჩვენი ნაბიჯებით არ გაჩნდეს შეკითხვები ქვეყნის სტაბილურობასა და ხელისუფლების კურსთან დაკავშირებით''.
მინისტრები რესპუბლიკელთა პარტიიდან მთავრობაში ყოფნის პერიოდში პრემიერ მინისტრის ხელმძღვანელობით, გააგრძელებენ პარლამენტის მიერ დამტკიცებული საპარლამენტო პროგრამის შესრულებას, მაგრამ პარლამენტში იქნება პირიქით, ფრაქცია ,,რესპუბლიკელები'' იხელმძღვანელებენ პარტიული პოლიტიკური პრიორიტეტებით, გარდა გარკვეული საკითხებისა, რომლებიც შესაძლოა, წინასწარ შეთანხმდეს უმრავლესობის რეჟიმში.
ბრიფინგზე აღინისნა, რომ ეს გადაწყვეტილება პარტიის ეროვნულმა კომიტეტმა 27 მარტს მიიღო, თუმცა დღემდე გასაჯაროება შეყოვნდა პრემიერ მინისტრის თხოვნით – კოალიციას ჭირდებოდა დრო , რომ მომზადებულიყო ახალი პოლიტიკური რეალობისთვის.
ამ წუთებში პარლამენტის თავმჯდომარე დავით უსუფაშვილი, რომელიც ამავე დროს რესპუბლიკური პარტიის ერთერთი ლიდერია, პრემიერმინისტრ გიორგი კვირიკაშვილს ხვდება. კომენტარები მხოლოდ შეხვედრის დასრულების შემდეგ გაკეთდება, მაგრამ საუბარი მტკიცე ვარაუდით ეხება რესპუბლიკური პარტიის განაცხადებას და ახალ პოლიტიკურ რეალიებს.