საქართველოს პრეზიდენტი გიორგი მარგველაშვილი აშშ–ში გაემგზავრა. იგი სიტყვით გამოვა ბირთვული უსაფრთხოების საერთაშორისო სამიტზე, რომელიც ხვალ და ზეგ გაიმართება ვაშინგტონში.
სიტყვით გამოვა იგი აგრეთვე ვახშამზე, რომელიც ბარაქ ობამას სახელით გაიმართება.
ვიზიტის ფარგლებში დაგეგმილია საქართველოს პრეზიდენტის შეხვედრები აშშ სენატორებსა და კონგრესმენებთან, უნგრეთის პრეზიდენტთან იანოშ ადერთან, პოლონეთის პრეზიდენტთან ანჯეი დუდასთან და ევროსაბჭოს თავმჯდომარესთან დონალდ ტუსკთან.
გიორგი მარგველაშვილი სიტყვით გამოვა ჯორჯ ვაშინგტონის უნივერსიტეტშიც.
სოციალურ ქსელებში აქტიურად განიხილება საქართველოს პრეზიდენტის აშშ – ში ვიზიტის მნიშვნელობა ჩვენი ქვეყნისათვის და, განსაკუთრებით, პრეზიდენტის ინსტიტუტის შერყეული პოზიციების აღდგენისათვის. ამ კონტექსტში სოციალური ქსელების მომხმარებელთა ნაწილის მიერ ეს ფასდება როგორც ერთგვარი რევანში ჩრდილოვანი მმართველისა და მთავრობის სამწლიანი მცდელობისათვის შეესუსტებინათ პრეზიდენტის როლი და ზეგავლენა ქვეყანაში მიმდინარე პროცესებზე.
,,რამხელა ბედნიერება აწერია სახეზე : შესაძლებლობა ეძლევა ობამას გადასცეს ჩურჩხელა ღარიბაშვილისაგან'' – ასეთ ირონიულ კომენტარს ურთავს ჟურნალისტი ოლეგ პანფილოვი პრეზიდენტის პრესსამსახურის მიერ გავრცელებულ ფოტოს, რომელიც ვაშინგტონში გამგზავრების წინ არის გადაღებული