ორ საათზე მეტხანს გაგრძელდა საქართველოში ვიზიტად მყოფი ევროპის სახალხო პარტიის (EPP) პრეზიდენტის ჟოზეფ დოლის შეხვედრა ე.წ. მატროსოვის ციხეში ყოფილ მაღალჩინოსნებთან “ნაციონალური მოძრაობიდან ” – ვანო მერაბიშვილთან, ბაჩოახალაიასა და გიგი უგულავასთან.
“მე მათ ვუთხარი, რომ ჩვენ ვიბრძვით, რათა საქართველო რაც შეიძლება მალე შევიდეს ევროპაში. ჩვენ გვინდა სახელმწიფო, რომელშიც კანონი კანონობს, უნდა იყოს სამართალი და დავამატებდი, რომ უნდა იყოს კორუფციის წინააღმდეგ ბრძოლა იმისთვის, რომ საქართველოში ახალგაზრდები განვითარდნენ, იცხოვრონ აქ და საქართველოში ინვესტიცია შემოვიდეს. მე ძალიან დიდი ემოციით გამოვედი. როცა ადამიანი შედის ციხეში, ეს იქნება ყოფილი პრემიერ-მინისტრი, ყოფილი შინაგან საქმეთა მინისტრი თუ ყოფილი მერი, ის შედის ციხეში და იქ რჩება. მით უმეტეს, როდესაც სამართალი არ არის სწორი ყოველთვის მათ მიმართ. მაგრამ მე მინდა ამავე დროს მადლობა გადავუხადო ხელისუფლებას, იმისთვის, რომ მომცა საშუალება, ხანგრძლივი საუბარი მქონოდა ამ სამ ადამიანთან. ისინი აგრძელებენ მუშაობას’’ – ასეთი კომენტარი გააკეთა ციხიდან გამოსვლის შემდეგ ჯოზეფ დოლიმ მედიისათვის. ამასთან მან გააჟღერა გზავნილები ყოფილი მაღალჩინოსნებისგან:
,,ერთ-ერთმა მათგანმა მითხრა, რომ მუშაობს თავის თავზე, იმისთვის, რომ არ გამოვიდეს გაბოროტებული ციხიდან და მაინც გამოიტანოს პოზიტივი აქედან. ჩემთვის ეს ძალიან პოზიტიური იყო” –– განაცხადა ევროპის სახალხო პარტიის (EPP) პრეზიდენტმა.