განმუხურში სანაპირო ზოლის და ბულვარის გაყიდვის წინააღმდეგ დღეს კიდევ ერთი საპროტესტო აქცია გაიმართა, სადაც ადგილობრივ მოსახლეობასთან ერთად „ერთიანი ნაციონალური მოძრაობის“ საპარლამენტო დეპუტატები – სერგო რატიანი და გიორგი თევდორაძე პარტიის წევრებთან და მხარდამჭერებთან ერთად იმყოფებოდნენ. „არა რუსი ოლიგარქის ახირებებს“, „ხალხი არ იყიდება“,“ზღვა ხე არ არის“ – ამ შინაარსის პლაკატებით აქციაზე დღეს განმუხურის მოსახლეობა გამოვიდა.

 შეკრებილების განცხადებით, ისინი არ არიან განმუხურში ინვესტიციების წინააღმდეგნი, თუმცა დაუშვებლად მიიჩნევენ სანაპირო ზოლისა და ბულვარის ტერიტორიის გაყიდვას. ნაციონალური მოძრაობის დეპუტატების განცხადებით, ტერიტორიის გასხვისება საპროტესტო აქციებს გამოიწვევს. უმცირესობის წევრები მიიჩნევენ, რომ აღნიშნული ტერიტორიით საქართველოს ყოფილი პრემიერ-მინისტრი ბიძინა ივანიშვილია დაინტერესებული.

განმუხურის სანაპიროს და ბულვარის მიმდებარე ტერიტორიას სახელმწიფო ქონების ეროვნული სააგენტო ელექტრონული აუქციონის წესით ყიდის. ტერიტორიის საწყისი ფასი 2 263 500 ლარია და ის პირობიანია – მყიდველი ვალდებული იქნება ტერიტორიაზე 10 მილიონი ლარის ინვესტიცია განახორციელოს.

რაც შეეხება აუქციონს, ის ხვალ, 30 მარტს უნდა დასრულდეს.