რესპუბლიკური პარტიის წევრები ამ ეტაპზე არც უარყოფენ და არც ადასტურებენ კოალიცია ქართული ოცნების შესაძლო დატოვების თაობაზე ინფორმაციას, რომელიც ბოლო პერიოდში აქტიურად ვრცელდება და აცხადებენ, რომ სამომავლო გეგმებზე პარტია სპეციალური განცხადების გაკეთებას დღეს გეგმავენ.
ოფიციალურ განცხადებად ვერ ჩაითვლება, მაგრამ მცირე ხნის წინათ "საქართველოს რესპუბლიკური პარტიის" თავმჯდომარის ხათუნა სამნიძის ფეისბუქ გვერდზე განთავსდა ინფორმაცია, რომლის თანახმად "საქართველოს რესპუბლიკურმა პარტიამ" საპარლამენტო არჩევნებში პარტიის მონაწილეობის ფორმაზე გადაწყვეტილება მიიღო. "26–27 მარტს საქართველოს რესპუბლიკური პარტიის ეროვნულმა კომიტეტმა იმსჯელა 2016 წლის საპარლამენტო არჩევნებში პარტიის მონაწილეობის ფორმაზე. მიღებულ გადაწყვეტილებას უახლოეს დღეებში ვაცნობებთ საზოგადოებას",- წერს ხათუნა სამნიძე.