განმუხურის სანაპირო ზოლის და ბულვარის მიმდებარე ტერიტორიის აუქციონის წესით გაყიდვის ფაქტს ადგილობრივ მაცხოვრებლებთან ერთად დღეს კიდევ ერთხელ გამოეხმაურნენ ნაციონალური მოძრაობის ზუგდიდის ორგანიზაციის ლიდერები. როგორც დღევანდელ საპროტესტო აქციაზე მათ განაცხადეს, ისინი ინვესტიციების განხორციელების წინააღმდეგნი არ არინ, თუმცა აღნიშნავენ, რომ ამისთვის არ არის აუცილებელი სანაპირო ზოლისა და ბულვარის მიმდებარე ტერიტორიის გაყიდვა.

განმუხურში ადგილობრივ მოსახლეობასთან ერთად მყოფი ნაციონალური მოძრაობის ლიდერების განცხადებით, არ შეიძლება სანაპირო ზოლის და ბულვარის ტერიტორიის გაყიდვა. ისინი აცხადებენ, რომ გამაფრთხილებელ აქციას ელექტრონულ აუქციონამდე ერთი დღით ადრე, 29 მარტს საქართველოს პარლამენტის წევრებთან ერთად ჩაატარებენ.

განმუხურში, სანაპირო ზოლისა და ბულვარის მიმდებარე ტერიტორიის ელექტრონული აუქციონის წესით გაყიდვაზე პირველი განცხადება ნაციონალური მოძრაობის ზუგდიდის ორგანიზაციაში გაკეთდა. პარტიის ლიდერების განცხადებით, აღნიშნული ტერიტორიით საქართველოს ყოფილი პრემიერ-მინისტრი ბიძინა ივანიშვილია დაინტერესებული. მიწის ნაკვეთის საწყისი ფასი 2 263 500 ლარია. ამასთან, მყიდველი ვალდებული იქნება აღნიშნულ ტერიტორიაზე 10 მილიონი ლარის ინვესტიცია განახორციელოს.