ზუგდიდში, თაბუკაშვილის ქუჩაზე კომპაქტურად ჩასახლებული დევნილები ადგილობრივი ხელისუფლებისა და დევნილთა სამინისტროსგან ყურადღებას და დახმარებას ითხოვენ. იძულებით გადაადგილებული პირების განცხადებით, ჩასახლების მაცხოვრებლებს მეექვსე დღეა წყალი არ მიეწოდებათ. მათი თქმით, რამდენჯერმე მიმართეს შესაბამის სამსახურებს, თუმცა ამ დრომდე არაფერია მოგვარებული. თაბუკაშვილზე მცხოვრები დევნილების თქმით, არის ოჯახები, რომლებსაც მძიმედ დაავადებული ადამიანები ჰყავთ ოჯახებში, რომლებსაც სჭირდებათ წყალი, თუმცა, მათი თქმით, აღნიშნული პრობლემის მოგვარებით არავინ ინტერესდება. ისინი მიმართავენ როგორც ლტოლვილთა და განსახლების მინისტრს და ასევე დევნილთა სამმართველოს ადგილობრივ წარმომადგენლობას რათა დროულად მოხდეს პრობლემის აღმოფხვრა.
თაბუკაშვილის ქუჩაზე შეკრებილებს დღეს დევნილთა სამმართველოს უფროსი მანუჩარ ჩილაჩავა შეხვდა. მისი თქმით, დაზიანებულია ცენტრალური წყლის საქაჩი და ხვალიდან აღნიშნული პრობლემა მოგვარებული იქნება.