სამეგრელო-ზემო სვანეთის გუბერნატორმა ლევან შონიამ დღეს, შოთა მესხიას სახელობის ზუგდიდის სახელმწიფო უნივერსიტეტში სტუდენტებს რეგიონის მასშტაბით განხორციელებული და დაგეგმილი ინფრასტრუქტურული პროექტები გააცნო. დღესვე, გუბერნატორმა სტუდენტებს რეგიონის მასშტაბით განხორციელებული პროექტების სამი წლის ანგარიშიც ჩააბარა. სახელმწიფო რწმუნებულის ინფორმაციით, ამ პერიოდის განმავლობაში განხორციელდა 1359 მსხვილი ინფრასტრუქტურული პროექტი, რისთვისაც ბიუჯეტიდან 632 მილიონი ლარი დაიხარჯა, სამუშაოების შესრულების დროს დასაქმდა 9 ათასამდე ადგილობრივი მცხოვრები. უნივერსიტეტის დარბაზში შეკრებილებს გუბერნატორმა ასევე სპეციალური ვიდეოკოლაჟი წარუდგინა, რომელიც 3 წლის განმავლობაში შესრულებულ სამუშაოებს ასახავდა. რეგიონის პირველმა პირმა შეკრებილებს ზუგდიდში ტექნოინოვაციების პარკის მოწყობის შესახებაც აუწყა. გუბერნატორის განცხადებით, შესაბამისი ინფრასტრუქტურის მოსაწყობად რამდენიმე ადგილი განიხილება, თუმცა კონკრეტულად თუ სად, ამაზე ლევან შონიას არ უსაუბრია. სახელმწიფო რწმუნებულის განცხადებით, 2016 წელი სამეგრელო-ზემო სვანეთში ახალგაზრდობის წლად ცხადდება. ანგარიშის პრეზენტაციის დასასრულს უნივერსიტეტის სტუდენტებს შესაძლებლობა მიეცათ კონკრეტული კითხვით მიემართათ როგორც გუბერნატორისთვის, ასევე შეხვედრის დამსწრე თვითმმართველობის წარმომადგენლებისთვის.
სამეგრელო-ზემო სვანეთის გუბერნატორის 3 წლის მუშაობის ანგარიშის პრეზენტაციას შოთა მესხიას სახელობის ზუგდიდის სახელმწიფო უნივერსიტეტში სასწავლო დაწესებულების რექტორი, უნივერსიტეტის ლექტორები და სტუდენტები თვითმმართველობის წარმომადგენლებთან ერთად დაესწრნენ.