სოფლის მეურნეობის სამინისტროს ცნობით, მეაბრეშუმეობის განვითარების პროექტის ფარგლებში საქართველში  შუა აზიიდან შემოტანილი თუთის ჰიბრიდული ჯიშის ნერგების დარიგება დაიწყო. 

დღეისათვის ნერგების ნაწილი გაცემულია   სამეგრელო-ზემო სვანეთის რეგიონში – 10 750 ნერგი, იმერეთში – 11 100, გურიასი – 13 800, კახეთში – 16 050, აჭარაში – 3 300.

ნერგები უსასყიდლოდ დაურიგდება  დაინტერესებულ ფერმერებს, სასოფლო-სამეურნეო კოოპერატივებსა და ნერგების მწარმოებლებს. 

ქართველმა ბიზნესმენმა, კომპანია ,,ასკანელი ძმების“ დამფუძნებელმა ჯიმშერ ჩხაიძემ უზბეკეთიდან ჩამოიტანა  თუთის ასი ათასი ნერგი და სახელმწიფოს გადასცა. 

 უზბეკეთიდან შემოტანილი ბუჩქოვანი თუთის ჰიბრიდული ნერგები ნაყოფს არ იძლევა და იგი გამოიყენება მხოლოდ თუთის აბრეშუმხვევიას გამოსაკვებად. თუთის ნერგების გაშენება შესაძლებელია როგორც ინტენსიური ნარგაობის, ასევე ერთეული ძირების სახით.