ოკუპირებულ აფხაზეთსა და საქართველოს ხელისუფლებას შორის ტყვეებსა და პატიმრების გაცვლის პროცესის შედეგად ზუგდიდის სამხარეო პოლიციის შენობაში 13 ტყვე მიიყვანეს. მათ შორის არის 1 ქალბატონი. თითოეული მათგანი აფხაზეთის ე.წ. სასამართლოს მიერ ე.წ. საზღვრის უკანონოდ გადაკვეთის ბრალდებით იყვნენ ნასამართლევი.
ტყვეების გადმოყვანის პროცესში აქტიურად იყო ჩართული პაატა ზაქარეიშვილი. მინისტრი ოკუპირებულ ტერიტორიაზე ჭუბურხინჯში რუსულ გენერალიტეტთან აწარმოებდა მოლაპარაკებას.
გავრცელდა ინფორმაცია იმის შესახებაც, რომ ქართველი ტყვეების სანაცვლოდ, რუსები ტერაქტისთვის ნასამართლევი მერაბ ყოლბაიას იგივე "კოჭოიას" გადაცემას ითხოვენ. თუმცა მისი გადაცემა ამ დრომდე ოფიციალურად არ დადასტურებულა.
ზაქრეიშვილმა ჟურნალისტებთან კომენტარი არ გააკეთა. ტყვეები კი დაბურულმინიანი ავტომობილებით ზუგდიდის სამხარეო პოლიციაში გადაიყვანეს.