სამეგრელოს რეგიონული არქივის ახალი შენობის გახსნის ცერემონიის პარალელურად ზუგდიდის ტროტუარებზე ფილების დამგებმა მუშებმა საპროტესტო აქცია გამართეს. ისინი იუსტიციის მინისტრ თეა წულუკიანთან შეხვედრას ითხოვდნენ. მუშების განცხადებით, მათ მინისტრთან შეხვედრა სურდათ, რათა მისთვის და ხელისუფლების სხვა წარმომადგენლებისთვის დამქირავებელი კომპანიისგან სახელფასო დავალიანების გასტუმრებაში დახმარება ეთხოვათ. დღესაც მუშებთან ერთად ადგილზე ქალაქ ზუგდიდის საკრებულოს ფრაქცია „ერთიანი ნაციონალური მოძრაობის“ წევრი ანა წითლიძე პარტიის სხვა წარმომადგენლებთან ერთად იმყოფებოდა.
სამეგრელოს რეგიონული არქივის გახსნის ცერემონიის დასასრულს იუსტიციის მინისტრი თეა წულუკიანი საპროტესტო აქციის მონაწილე მუშებს შეხვდა. როგორც მათ შეხვედრის შემდეგ განაცხადეს, მინისტრისგან მიიღეს პირობა, რომ აღნიშნული საქმით დაინტერესდება და მათ კომპეტენციის ფარგლებში დაეხმარება.