გავრცელებული ინფორმაციით, საქართველოს მოქალაქეებისთვის უვიზო გადაადგილება უახლოეს მომავალში გახდება შესაძლებელი. ბრიუსელი საქართველოსთვის ვიზალიბერალიზაციის მინიჭების საკითხზე გადაწყვეტილებას ცალკე გამოაცხადებს. ევროკომისია მარტში გეგმავს მიმართოს ევროპარლამენტს და ევროპულ საბჭოს .
ვიზა ლიბერალიზაციასთან დაკავშირებით შეფასებები დილიდან კეთდება პარლამენტში. დეპუტატებს იმედი აქვთ, რომ საქართველოს მოქალაქეები უკვე ზაფხულიდან შეძლებენ უვიზოდ იმოგზაურონ ევროკავშირის ნებისმიერ ქვეყანაში.
„დარჩენილია პოლიტიკური ნაწილი და პოლიტიკურ ნაწილზეც გვაქვს აბსოლუტური მხარდაჭერა. თავიდანვე, როგორც ითქვა, რადენიმეთვიანი პროცედურაა, რაც ამ პროცედურების გავლას სჭირდება და აბსოლუტურად დარწმუნებული ვართ, რომ რამდენიმე თვეში საქართველოს მოქალაქეებს შეეძლებათ თავისუფლად იმოგზაურონ ევროპაში,“ – განაცხადა ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა სოზარ სუბარმა.
განცხადება გაკეთდა საპარლამენტო უმცირესობაშიც. ნაციონალური მოძრაობის წარმომადგენლებმა დღეს მადლობა გადაუხადეს ყველა იმ ადამიანს, ვინც წლების განმავლობაში მუშაობდა იმისთვის, რომ ქვეყანას ევროკავშირთან უვიზო მიმოსვლა მიეღო.
„ეს არის არა ერთი წლის, ძალიან ბევრი ადამიანის შრომის შედეგი. ხელს შეუწყობს ქვეყნის ინტეგრაციას და კონკრეტული ადამიანების მდგომარეობას გააუმჯობესებს," – აღნიშნა სერგო რატიანმა.