დეპუტატ ალექსი პეტრიაშვილზე მომხდარ თავდასხმას ნაციონალურ მოძრაობაში აფასებენ როგორც შემაშფოთებელ ფაქტს, რომელიც კიდევ ერთი დასტურია იმისა, რომ ქართულმა ოცნებამ შექმნა გარემო, სადაც წახალისებულია ანგარიშსწორება ოპოზიციის წევრებთან.
ოპოზიცია კრიმინოგენული სიტუაციის გაუარესებაში ხელისუფლებას ადანაშაულებს და აცხადებს, რომ ამ ფაქტის გამოძიება მოსალოდნელია ისევე გაწელილი და უშედეგო აღმოჩნდეს, როგორც პოლიტიკურ ოპონენტებზე თავდასხმების წინამორბედი ათეულობით ფაქტისა ,, ეს არის შედეგი ბიძინა ივანიშვილის მიერ დამკვიდრებული პოლიტიკისა, როდესაც პოლიტიკური ოპონენტების წინააღმდეგ ნებადართულია და საქართველოში ზოგადად ნებადართულია ასეთი სახის გარჩევები,“-აცხადებენ ნაციონალურ მოძრაობაში.
ალექსი პეტრიაშვილზე თავდასხმასთან დაკავშირებით განცხადებები გაკეთდა საპარლამენტო უმრავლესობის მხრიდანაც . დეპუტატები აცხადებენ, რომ თავდასხმის მოტივი მათთვის უცნობია. თუმცა აღნიშნავენ, რომ აუცილებელია ეს საქმე დროულად იქნეს პროკურატურის მიერ გამოძიებული და საზოგადოებას დროულად უნდა წარედგინოს ანგარიში.