ზუგდიდში „ქართული ოცნება – დემოკრატიული საქართველოს“ საქალაქო ორგანიზაციას ახალი თავმჯდომარე ჰყავს. კონფერენციაზე, რომელიც კულტურტის ცენტრ ოდიშის დარბაზში ჩატარდა, დელეგატებმა ერთხმად ედიშერ თოლორაია აირჩიეს, რომელიც ამავდროულად ზუგდიდის მუნიციპალიტეტსი გამგებელიცაა. დღევანდელ კონფერენციას საქართველოს ენერგეტიკის მინისტრი, ვიცე-პრემიერი კახა კალაძე და ქართული ოცნების აღმასრულებელი მდივანი ირაკლი კობახიძე დაესწრნენ. ვიცე-პრემიერის განცხადებით, თვის ბოლომდე პარტია დაასრულებს რეგიონალურ კონფერენციებს, რომლის შემდეგ ჩატარდება პარტიული ყრილობა.
ქართული ოცნების დღევანდელ კონფერენციას ადგილობრივი ხელისუფლების წარმომადგენლები, კოალიციის მხარდამჭერები და მოწვეული სტუმრები ესწრებოდნენ, რომელთა შორის იყვნენ ზუგდიდის რამდენიმე სკოლის დირექტორები. ჟურნალისტების კითხვაზე, ხომ არ იყო სკოლის დირექტორების დასწრება პარტიულ კონფერენციაზე კანონის დარღვევა, ქალაქ ზუგდიდის საკრებულოს საფინანსო-საბიუჯეტო კომისიის თავმჯდომარის კახა ფარცვანიას განმარტებით არა, რადგან კანონი არ კრძალავს მათ დასწრებას არასამუშაო საათებში და ისინი მოწვეულები იყვნენ როგორც სტუმრები.
ედიშერ თოლორაია პარტია „ქართული ოცნება – დემოკრატიული საქართველოს“ ზუგდიდის ორგანიზაციის თავმჯდომარედ უკვე მესამედ აირჩიეს.