საქართველოს ყოფილი პრემიერ-მინისტრი შესაძლოა ციხისძირის შემდეგ ზუგდიდის ბოტანიკური ბაღითაც დაინტერესდეს და თვალი 200 წლოვან ხეებს დაადგას. ამჟამად ზუგდიდის ბოტანიკურ ბაღში სამი უიშვიათესი ხეა, რომელიც ეკატერინე დადიანმა საზღვარგარეთიდან ჩამოიტანა და რომელიც ევრაზიის კონტინენტზე ერთადერთ ეგზემპლარს წარმოადგენს. გავრცელებული ინფორმაციით, ქვეყნის ყოფილ პრემიერ-მინისტრს მისი გადატანა შეკვეთილში სურს.
ადგილობრივები ივანიშვილის გაუხმაურებელ ვიზიტს იხსენებენ, როცა ის ჯერ ანაკლია-განმუხურში ჩავიდა, ხოლო შემდეგ სამეგრელო-ზემო სვანეთის გუბერნატორთან ერთად ზუგდიდის ბოტანიკური ბაღი დაათვალიერა. მოსახლეობა ამბობს, რომ თუ აღნიშნული ეჭვები გამართლდა, ისინი წინ აღუდგებიან ამ ფაქტს და თუ საჭირო გახდა თავად დაიცავენ უიშვიათესი ჯიშის მცენარეებს.
ზუგდიდის ბოტანიკური ბაღი 26 ჰექტარ მიწის ნაკვეთზეა გაშენებული და ტერიტორიაზე სხვადასხვა სახეობის მცენარეებია გაშენებული, მათ შორის ზოგიერთი ორი საუკუნისაა.