სამოქალაქო ჩართულობის ცენტრმა ფრიდრიხ ნაუმანის ფონდი თავისუფლებისათვის წარმომადგენლობა საქართველოს“ მხარდაჭერით „თანამედროვე ჟურნალისტიკის განვითარების პროგრამის“ პრეზენტაცია დღეს ზუგდიდის მუნიციპალიტეტის გამგეობის სხდომათა დარბაზში გამართა. შეხვედრის დამსწრეებს, რომელთა უმრავლესობა ჟურნალისტი იყო, ორგანიზაციის წარმომადგენლებმა პროექტის მიზნები და ამოცანები გააცნეს. ორგანიზაცია პროექტ „თანამედროვე ჟურნალისტიკის განვითარების პროგრამის“ ფარგლებში საქართველოს 11 ქალაქში დასაქმებულ 30 ჟურნალისტს გადაამზადებს, რომლებსაც კვალიფიციური ტრენერების მიერ ტრენინგები ჩაუტარდება ინტერვიუს, ანონსის, პრეს-რელიზისა და ახალი ამბების მომზადების სპეციფიკაში, ლიბერალიზმის ფუნდამენტური პრინციპებისა და სამართლებრივი ტერმინოლოგიის შესწავლის მიმართულებით. ტრენინგების ერთ-ერთ კურსს ადგილობრივი ჟურნალისტებისთვის სამაუწყებლო კომპანია რუსთავი 2 -ის კორესპონდენტი დავით ქაშიაშვილი ჩაატარებს. აღნიშნულ ტრენინგებს და გადამზადების კურსების ჩატარებას მიესალმებიან ჟურნალისტებიც. ტრენინგ-კურსის დასრულების შემდეგ დატრენინგებულ პირებს დაევალებათ ათი დღის განმავლობაში 5 ახალი ამბისა და 2 სტატიის მომზადება, რის შედეგადაც თითოეულ რეგიონში სამი საუკეთესო სტატიისა და ახალი ამბის ავტორი შეირჩევა, რომლებიც პროექტის დასრულებამდე მოამზადებენ სხვადასხვა თემებზე საინტერესო სტატიებსა და ახალ ამბებს. მომზადებული თემები კი ანალიტიკურ საინფორმაციო სააგენტო მედიაკლუბ.გე -ზე განთავსდება.