გუშინდელმა სესიამ კიდევ ერთხელ დაადასტურა, რომ უმრავლესობა დაბნეული და არაადეკვატურია, ეს კი "ქართული ოცნების" დაშლის წინაპირობაა – მმართველ გუნდში არსებულ კრიზისზე კიდევ ერთხელ საუბრობენ ექსპერტები. ანალიტიკოსების შეფასებით, „ქართულმა ოცნებამ“ თავის თავი ამოწურა, პარტიის შიგნით კი „სამოქალაქო ომია.“
“პოლიტიკაში ერთ-ერთი ყველაზე დამაზიანებელი კომიკურობაა და კომიკური გახდა „ქართული ოცნება." ტვინი აქვთ არეული, ღილაკები კი არა და არ იციან რა გააკეთონ. ჩემი აზრით, ხალხის გადინება „ქართული ოცნებიდან“ გაგრძელდება,“-აცხადებს "საქართველოს სტრატეგიული ანალიზის ცენტრის (GSAC)" დამფუძნებელი, ნოდარ ხარშილაძე.
კომიკურს უწოდებს „ქართული ოცნების“ დეპუტატების და ლიდერების ქმედებას ექსპერტი გია ხუხაშვილი. მისი თქმით, პარტიის დაშლის პროცესი გარდაუვალია, რადგან მხოლოდ ბიძინა ივანიშვილი ვერ შეძლებს პროცესების მართვას.
„რაც დასანგრევია მაინც დაინგრევა, რამდენადაც არ უნდა ეცადო შენ ბოძი შეუმაგრო და მხარი შეუყუდო“-ამბობს ხუხაშვილი.
ბიძინა ივანიშვილის პირადი დავალების მიუხედავად, უმრავლესობამ ზვიად კვაჭანტირაძის პოსტიდან გადასაყენებლად ხმები ვერ მოაგროვა. ვითარება თავად კვაჭანტირაძემ განმუხტა და დიასპორის საკითხთა კომიტეტის თავმჯდომარის პოსტი საკუთარი სურვილით დატოვა.