პარლამენტში საგზაო მოძრაობის წესებში შესატანი ცვლილებების განხილვა მიმდინარეობს. პარალელურად თბილისში, პარლამენტის შენობასთან გრძელდება საპროტესტო აქცია საკანონმდებლო ცვლილებების წინააღმდეგ, აქციაზე მარჯვენასაჭიანი მანქანების მძღოლებთან ერთად შეკრებილები არიან ავტოდილერები და არასამთავრობო ორგანიზაციები.მ აქციის მონაწილეები მოითხოვენ მარჯვენასაჭიანი ავტომობილების რეგისტრაციის აკრძალვის საკითხის გაუქმებას, განბაჟების სისტემის შეცვლას, ასევე 100-ქულიანი სისტემის ამოქმედების გადავადებას.
აქციამ ინცინდენტის გარეშე ვერ ჩაიარა – როდესაც შენობასთან დეპუტატი თამაზ მეჭიაური მივიდა, მძღოლები მას სტვენითა და უკმაყოფილო შეძახილებით შეხვდნენ, გაწევ-გამოწევა დასრულდა იმით, რომ ერთერთი მძღოლის არტურ არუთინოვის მტკიცებით, მას დეპუტატმა ხელი გაარტყა. მან უკვე მისცა შესაბამისი ჩვენება პოლიციას ადვოკატს თანდასწრებით.
თავად დეპუტატი თამაზ მეჭიაური პარლამენტთან მიმდინარე აქციის მონაწილისთვის ხელის დარტყმას არ ადასტურებს.
ინციდენტის გასარკვევად "ერთიანი ნაციონალური მოძრაობის" წევრი ნიკა მელია პერიმეტრზე დამონტაჟებული კამერების ჩანაწერების ნახვას და თამაზ მეჭიაურის დაკითხვას მოითხოვს.