საფეხბურთო კლუბმა "ზუგდიდი" დღეს მედიას ახალი მთავარი მწვრთნელი წარუდგინა. 50 წლის  იური ბაკალოვი, ოფიციალურად მუშაობას შეუდგა. ორმხრივი შეთანხმების საფუძველზე უკრაინელი სპეციალისტი კლუბს მიმდინარე სეზონის ბოლომდე გაწვრთნის, თუმცა მომავალი შედეგებიდან გამომდინარე შესაძლოა ბაკალოვს ხანგრძლივი კონტრაქტიც შესთავაზონ და გუნდის მწვრთნელად დარჩეს. უკრაინელმა სპეციალისტმა ფეხბურთელებთან ერთად უკვე ჩაატარა ვარჯიშები. ამასთან, გუნდი ორკვირიანი შეკრებით 30 იანვარს თურქეთში გაემგზავრება და ანტალიაში მოემზადება, სადაც რამდენიმე ამხანაგურ შეხვედრასაც გამართავს. რაც შეეხება ყოფილ მწვრთნელს ლევან მიქაძეს, ის უკრაინელი სპეციალისტის ასისტენტად დარჩება და მასთან ერთად მამუკა ჭაჭუაც იმუშავებს.