თურქული გამოცემა „ჰაბერ იზმირი“ ავრცელებს ინფორმაციას, რომ თურქეთი 2016 წლიდან სავიზო რეჟიმს 89 ქვეყანას დაუწესებს, მათ შორის საქართველოს, რუსეთს და აზერბაიჯანს .სავიზო პოლიტიკის გამკაცრება, გამოცემის აზრით, თურქეთისთვის ევროკავშირთან უვიზო მიმოსვლის ერთ-ერთი წინაპირობა იყო .თავად თურქეთში თვლიან, რომ მოქალაქეებისთვის ევროკავშირში უვიზოდ სიარული მნიშვნელოვანი ნაბიჯია, თუმცა ამ მოტივით უცხო ქვეყნების მოქალაქეთათვის სავიზო რეჟიმის შემოღება უარყოფითად აისახება ტურისტების რაოდენობაზე.
ამ ინფორმაციამ უკვე გამოიწვია საქართველოს მოსახლეობის იმ ნაწილის შეშფოთება, რომელიც აქამდე უპრობლემოდ გადადიოდა თურქეთის ტერიტორიაზე, თუმცა საგარეო საქმეთა მინისტრი მიხეილ ჯანელიძე არ ადასტურებს ინფორმაციას, რომ თურქული მხარე საქართველოსთან სავიზო რეჟიმის შემოღებას დაუყოვნებლივ, მიმდინარე ეტაპზე აპირებს. ,, ჩვენ ჯერჯერობით ვერ ვხედავთ რაიმე საჭიროებას ან გარემოებას, რომელიც უცილობელს გახდიდა უვიზო რეჟიმის გაუქმებას ამ ეტაპზე. '' – განაცხადა მინისტრმა ჟურნალისტებთან საუბარში მთავრობის სხდომის დაწყებამდე. მან პირდაპირი პასუხი არ გასცა ჟურნალისტების კითხვას – მიმდინარეობს თუ არა ამ საკითხზე კონსულტაციები თურქეთის მთავრობასთან და აღნიშნა, რომ ამის შესახებ საზოგადოებას დამატებით მოახსენებს.