დღეს ზუგდიდის ინფექციური საავადმყოფოს სამედიცინო პერსონალმა შენობაში შესვლის საშუალება არ მისცა ახალ ფინანსურ დირექტორს ნოდარ ჩიქოვანს, რომელიც საავადმყოფოში კომპანია „ბლოკ ჯორჯიას“ წარმომადგენლების თანხლებით მივიდა. სამედიცინო პერსონალს პაციენტთა ნაწილიც შეუერთდა. საჭირო გახდა დაცვის პოლიციის მობილიზებაც. ინცინდენტი დასრულდა იმით, რომ მხარეებს შორის შეთანხმება არ შედგა და ნოდარ ჩიქოვანს ტერიტორიის დატოვება მოუხდა.
ზუგდიდის ინფექციური საავადმყოფოს ხელმძღვანელობა ამტკიცებს, რომ „ბლოკ ჯორჯია“ 2007 წელს საეჭვო ვითარებაში გახდა საავადმყოფოს მფლობელი და სანამ მფლობელობის საკითხზე დავა სასამართლო წესით არ გადაწყდება , არ აღიარებს კომპანიის უფლებას ჩაერიოს მენეჯმენტის საკითხებში. თავის მხრივ ,,ბლოკ ჯორჯია'' მიიჩნევს, რომ მოდავე მხარის მიერ სასამართლოში შეტანილი სარჩელი უსაფუძვლოა და როგორც საავადმყოფოს ხელმძღვანელობა აცხადებს, იგი ყველა საშუალებით, მათ შორის ფინასური ბერკეტების გამოყენებითაც უპირისპირდება საავადმყოფოს მედპერსონალის მცდელობას არ დაუშვას შენობის დასაკუთრება ამ კომპანიის მიერ.
როგორც ექიმ-ინფექციონისტი თეიმურაზ მაჭავარიანი ამბობს, კომპანიას არავითარი ინვესტიცია არ ჩაუდვია საავადმყოფოს რეკონსტრუქციისა და განვითარებისათვის, დღეს კი უსაფუძვლოდ ერევა მენეჯმენტში და მედპერსონალს დაუმორჩილებლობისთვის სახელფასო ანგარიშების დაბლოკვითაც სჯის – საავადმყოფოს თანამშრომლებს არ მიუღიათ ერთი თვის შრომის ანაზღაურებაც. ,, თუკი კომპანია საკითხს აყენებს კუთხით – ან ხელფასები ან კომპანიის აღიარება კანონიერ მფლობელად, მზადა ვართ უარი ვთქვათ ხელფასების მიღებაზეც, სანამ დავა არ გადაწყდება სასამართლოში, არ დავთმობთ და არ შემოვუშვებთ''. – აცხდებენ საპროტესტო აქციის მონაწილეები.
„ბლოკ ჯორჯიას"დირექტორის ვახტანგ ჯანაშვილის განმარტებით, კომპანიამ შენობა შეიძინა კანონის სრული დაცვით, მისი მფლობელობის უფლება დოკუმენტურად არის დადასტურებული და დარეგისტრირებული საჯარო რეესტრში. მისი თქმით, 2007 წელს ეს საავადმყოფო შეიძინეს იმ პირობით, რომ გაკეთდებოდა ზუგდიდის რეფერალური საავადმყოფოს რეკონსტრუქცია, ეს დაწესებულება დაიხურებოდა და გადმოვიდოდა საავადმყოფოს გარემონტებულ შენობაში, თუმცა ეს , მოდავე მხარის მხრიდან პირობა დაირღვა .