გურჯაანის სასამართლოსთან, სადაც დავით კირკიტაძის სასამართლო პროცესი უნდა გაიმართოს, გაერთიანებული ოპოზიციის აქცია მიმდინარეობს.
,,ე.წ. ხელისუფლებამ უნდა იცოდეს, რომ არც ერთ ჩვენს მეგობარს და მხარდამჭერს არ დავაჩაგვრინებთ. სტრასბურგამდეც რომ დაგვჭირდეს მისვლა, დავით კირკიტაძე იქნება თავისუფალი, რადგან ის თავის კონსტიტუციურ უფლებას იცავდა'', – ამ სიტყვებით მიმართა გურჯაანის რაიონულ სასამართლოსთან შეკრებილ გაერთიანებული ოპოზიციის მხარდამჭერებს გრიგოლ ვაშაძემ.
„რატომ არის დავით კირკიტაძე დაკავებული? იმიტომ, რომ ამ ხელისუფლებას საქართველოს მოქალაქის ეშინია. ერთ კვირაში გაზის ფასი რომ აიწევს, ნახავენ ეს მოქალაქეები რას იზამენ. რა კანონი და რა სასამართლო გვაქვს? ზაზა სარალიძის შვილის მკვლელები, მალზაზ მაჩიკაშვილის შვილის მკვლელები გარეთ დადიან. სამართალი მხოლოდ დავით კირკიტაძეზე მოქმედებს?
რუსეთის ფედერაციაში წაიღე ბატონო ბიძინა ეს შენი დემოკრატია! აუცილებლად მოვიგებთ ამ ბრძოლას! ამ საქართველოს იმაზე უკეთესი დამცველი არ ჰყავს, ვიდრე გაერთიანებული ოპოზიცია. ჩვენ თქვენზე ჭკვიანები ვართ, დემოკრატიულად მოგიგებთ და გაგიშვებთ მოუსავლეთში, იქ საიდანაც მოხვედით, – განაცხადა ვაშაძემ.
,,დღეს თუ ვინმე უნდა იჯდეს საბრალდებო სკამზე, ეს დავით კრიკიტაძე კი არ უნდა იყოს, უნდა იყოს იმ პროვოკაციის მთავარი ორგანიზატორი, ბატონი გიორგი გახარია,“ – ეს განცხადება "ერთიანი ნაციონალური მოძრაობის” თბილისის ორგანიზაციის თავმჯდომარემ, ზაალ უდუმაშვილმა გააკეთა.
უდუმაშვილის შეფასებით, ველისციხეში აქციის მშვიდობიან მონაწილეებს გზის გაგრძელების და თელავის ცენტრში მშვიდობიანი აქციის გამართვის შესაძლებლობა სწორედ გიორგი გახარიამ არ მისცა და მომხდარ ინციდენტებზე სრული პასუხისმგებლობა სწორედ შს მინისტრს ეკისრება.
„გახარიამ დაგეგმა პროვოკაცია აქციის მშვიდობიანი მონაწილეების მიმართ და ჩახერგა ველისციხეში გზა და ის არის ამ დღის მთავარი ორგანიზატორი და მთავარი პროვოკატორი,“ – განაცხადა უდუმაშვილმა.
სასამართლო ბიძინა ივანიშვილს სრულად ემორჩილება. ჩვენ პოზიტიური განწყობები და იმედი არ გვაქვს იმ სასამართლოსი, რომელიც დღეს არის ქცეული პირად ნოტარიუსად ივანიშვილის, თუმცა, ამ შემთხვევაში ჩვენ უფრო იმედი გვაქვს მოსამართლის პირადი გადაწყვეტილების, რამდენად ვაჟკაცი იქნება მოსამართლე და რამდენად შეძლებს, მიიღოს ობიექტური გადაწყვეტილება,“ – განაცხადა ზაალ უდუმაშვილმა