დღეს დილიდან რკინიგზის ავტოსადგურზე მძღოლების აქცია გაიმართა. სხვადასხვა ქალაქის მიმართულებით მოძრავი ავტობუსებისა და მიკროავტობუსების მძღოლები თურქული კომპანია მეტრო+-ის ბაზარზე შემოსვლის წინააღმდეგ გამოდიან. მძღოლების განცხადებით, კომპანიამ საქართველოში უკვე შემოიყვანა  მიკროავტობუსები და სულ მალე ალბათ მუშაობასაც შეუდგებიან. მძღოლები კი ამბობენ, რომ არ დაუშვებენ კომპანიის შემოსვლას. მოგვიანებით მძღოლებმა მერიასთან გადაინაცვლეს, სადაც მშვიდობიანი აქცია მოაწყვეს. აქციის მონაწილეებს მერიის წარმომადგენლები შეხვდნენ.ვიცე-მერის გია გულორდავას განმარტებით, ადგილი, სადაც კომპანია მეტრო + ის სადგური უნდა განთავსდეს,მათ მფლობელობაში არ შედის და შესაბამისად ნებართვასაც ვერ გასცემენ. ტერიტორიასთან დაკავშირებით თურქული კომპანია მოლაპარაკებას აწარმოებს ყრუთა კავშირის წარმომადგენლობასთან,რომელმაც კომპანიას სარგებლობაში ტერიტორია ხელშეკრულებით ერთი წლის ვადით გადასცა. ინფორმაცია ყრუთა კავშირში დაადასტურეს.